“Ami mós hetan konvite husi Komisaun F, atu rona JSMP nian hanoin liliu esbosu lei protesaun ba labarik, hanesan ohin ita-boot ko’alia títulu, los ami mós preokupa oituan ho títilu ne'ebé iha esbosu lei ne'e”, dehan nia iha servisu fatin Kolmera, kuarta (04/08).
Maske, membru Komisaun F, PN inisia ona lei ne'e, maibé JSMP konsidera lei ne'e sei haree liuba labarik sira-nia risku, tanba liga ho titulu ne'ebé Komisaun F hanaran (Projetu-lei kona-bá protesaun ba labarik no foinsa’e iha perígu).
Husi kontiudu lei ne'e, hatudu katak, wainhira labarik sira enfrenta violénsia, hetan ameasa ruma liga ba sira-nia diretu mak hafoin bele regula ho lei refere.
Ho ida ne'e, JSMP mós propoin ona, atu lei ne'e labele haree ba risku maibé ba haree mós diretu fundamental tomak husi labarik sira-nian.
Tanba ne’e, hakarak atu tau lei ne'e hanesan rejime jurídiku ida, atubele proteze diretu liberdade no protesaun labarik, inklui ba adolosente sira-nian.
“Ami-nia hakarak, para lei ne'e labele haree de'it ba risku maibe haree mós ba diretu fundamental sira seluk, hanesan saúde, edukasaun, oinsá labarik sira goza sira-nia bens estar sira iha durante sira hanesan labarik ne'e mós regula iha ne'e”, dehan nia.
Maske nune'e, JSMP hato'o agradesimentu boot ba inisiativa tomak, tanba lei protesaun labarik ne'e tinan 10 resin ona la diskute, maibé agora komisaun F konsege tau prioridade atu diskute. (*)