“Iha prizaun, tanba konfinamentu obrigatóriu jerál iha Munisipiu Ermera ho Postu Railako, depois Serka Sanitária, ha'u fó ona orientasaun ba diretór prizaun Gleno nian ne'e suspende lai vizita família sira ba prizaun, to'o ita haree took ninia evolusaun ne'e halo nusá”, dehan Manuel Cárceres, iha Palásiu Governu, kuarta (04/08).

Tanba iha semana oin mak hanoin Governu liuhus Konsellu Ministru (KM) sei haree filafali ona impozisaun Serka Sanitária ho konfinamentu obrigatóriu jerál iha Munisípiu Ermera.

“Sé iha ne'e mak konsellu ministru haree dehan situasaun iha ne'ebá ne'e muda ona e konsellu ministru, governu foti fali ona konfinamentu ne'e, ita mós loke fali ona prizaun ba maluk sira ne'ebé atu ba vizita sir-nia maluk. Mais, to'o ohin loron, ha'u sei husu ba diretór prizaun, suspende lai vizita família nian”, informa nia.

Maske nune'e, bainhira iha asuntu emerjénsia ne’ebé karáter importante, guarda prizionál sira bele autoriza família halo vizita ba sira-nia maluk dadur sira.

“Anaun ser urjénsia. Buat ne'ebé ke urjénsia, presiza moras atu ba, ou presiza duni katak família tenke ser ba duni, Amu Lulik tenke ser ba, entaun ne'e loke. Mais, vizita baibain ne'e ita suspende lai tanba ita hatene katak, sira mós foin rekuperadu hotu. Uluk, to'o kedas ema 60 mak infetadu, agora grasas adeus sira rekuperadu hotu ona, sira vasina ona, ita akompaña lai evolusaun situasaun Ermera nian”, afirma nia.

Desizaun hodi suspende ka hapara provizóriu vizita husi família dadur sira-nian ne’e, la aplika ba Munisípiu Covalima (Suai) ho Dili, tanba livre husi konfinamentu Obrigatóriu.

Maibé, iha loron 03 fulan-Agustu, simu informasaun katak, iha dadur foun ida mak pozitivu ona Covid-19, maske dadur balu simu ona vasinasaun.

“Ermera laiha pasiénte, sira rekuparadu hotu ona, Suai mós rekuperaru hotu ona. Tanba ida ne'e mak ita taka lai Ermera”, dehan nia. (*)