"Ami mai marka audiénsia ho Primeiru Ministru liliu atu partilla PDHJ nia relatóriu annual 2020 nian ne'ebé entrega ona bá Parlamentu Nasionál iha fulan-Juñu, e partilla mós kópia ida ho Primeiru Ministru, tanba iha relatóriu annual ne'e, iha mós rekomendasaun lubun ida bá governu Timor-Leste hanesan rekomendasaun par governu bele aselera prosesu ratifikasaun konvensaun internasionál bá direitu ema ho difisiensia nian”, dehan Provedora Jesuina Maria Ferreira Gomes, hafoin aprezenta relatóriu annual PDHJ bá tinan 2020 Primeiru-Ministru (PM), Taur Matan Ruak iha Rezidénsia Farol, kuarta (21/07).
Haree ba konvensaun internasionál bá direitu ema ho difisiensia ne'e importante tebes bá estadu Timor-Leste atu ratifika ho lalais.
Tanba ratifikasaun bá konvensaun internasionál ne'e, ezekutivu liuhusi Ministériu Justisa mak tenke halo preparasaun, nune'e Parlamentu Nasionál bele ratifika.
"Ne'ebé sé governu bele aselera prosesu ne'e, entaun Parlamentu Nasionál bele ratifika konvensaun internasionál direitu bá ema ho difisiensia, tanba Timor-Leste agora iha purvolta de 38.000 ita-nia maluk sira-ne'ebé ho difisiensia”, afirma nia. (*)