Primeiru interrogatoriu iha Tribunal Distrital Dili, Segunda (15/07/2019), Prokurador Sergio Tilman akuza mos arguida nain rua, viola Kodigu Penal artigu 297 konaba abuza poder.
Arguida LVDA hatete, nia uza karreta estadu ne'e para konfirma otel iha Kupang no au mesmo tempo, lori ninia oan ba konsulta.
“Ha'u uza osan privadu hodi sosa kombustivel. Ha'u la simu perdiem no bainhira entrega filafali, karreta ne'e ho kondisaun dia'k,” LVDA esplika.
Maski nune'e, sasin João Paulo nu'udar fiskal uniku KI nian hatete, arguida nain rua la hetan karta autorizasaun husi superior, bainhira hala'o viazem ba Kupang, Indonesia. Nia dehan, baibain bainhira KI hetan konvite husi nasaun seluk, tenki lori uluk ba plenaria hodi deside sei mak bele halo viazem.
“Iha kontekstu arguida na'in rua ne'e, la liu hosi plenaria,” João Paulo haktuir.
Juiz singular Yudi Pamungkas deside, adia prosesu julgamentu ne'e ba loron 25 Jullu hodi rona deklarasaun hosi sasin seluk. Iha primeiru interrogatoriu ne'e, arguida nain rua hetan akompania mos hosi ida-idak nia defensora.