Tempotimor (Dili) - Relasiona ho kazu ne’ebé akontese iha Suku Leorema, Postu Administrativu Bazartete-Likisa ne’ebé hamete ema na’in rua no lima kanek, inklui sunu uma, maka familia uma kain hamutuk 13 oras ne'e refujia hela iha Eskuadra Polisia Likisá. 

“Loos duni oras ne’e familia uma kain 13 mak komandu Polisia Nasional Timor Leste Munisípiu Likisá asegura, tanba kestaun seguransa ne’ebé sira rasik preokupa", dehan Komandante Jerál PNTL, Faustino da Costa, iha Palásiu Prezidensiál Bairru-Pité, Kinta (11/7).

Husi komunidade sira ne'e, nia dehan, balun uma laiha tanba sira nia uma hetan sunu.

Liga ba kazu ne’ebé akontese iha Leorema, komandu PNTL Munisípiu Likisá hamutuk ho prezidente atoriedade likisa kontinua buka solusaun ba komunidade sira ne'e.

“Oras ne’e buka hela dalan para oinsa ita atu responde. Primeiru emerjensia, segundu ba nia kontinuasaun. s Será ke ita halo diálogu para integra fila fali komunidade sira ne’e”, tenik nia.

Komandante ne’e dehan, família 13 ne’ebé asegura iha Eskuadra Komandu Polisia Likisá hamutuk ema na'in 53 no iha na’in 14 mak estudante.