Nune’e, funsionáriu na'in-ualu (8) devolve ona osan subsídiu ho montante dollár amérikanu atus-rua (US$200) ba kofre estadu.
"Iha dadus ne'ebé mak ami hetan, depois ita halo komunikasaun, halo koordenasaun, iha na'in-8 ona mak entrega ba ministériu solidariedade sosiál, iha balu ne'ebé planu hela atu entrega, mais ita seidauk hatene nia mekanizmu”, dehan Adjuntu Komisáriu KAK ba asuntu prevensaun no sensibilizsaun, Luis Oliveira Sampaio ba www.tempotimor.com, Farol, tersa (08/06).
Tanba tuir kritéria, funsionáriu públiku no privádu sira ne'ebé kada fulan simu saláriu dollár atus-lima (US$500) ba leten, sei laiha direitu atu simu subsídiu husi governu.
"Ami trava kedan imediatamente ne'e totál ne'ebé osan, maizumenus iha osan US$385,400 mill, ida ne'e mak ita trava. Agora, númeru ida funsionáriu ne'e mak ita seidauk, ita hein tan prosesu la'o tiha mak ita foin haree", informa Adjuntu Komisáriu KAK ba asuntu prevensaun no sensibilizsaun, Luis Oliveira Sampaio
Maske nune’e, KAK la konsege identifika benefisiáriu sira ne'ebé devolve ona osan husi instituisaun ne'ebé, maibé importante entrega fila-fali osan ho vontade rasik.
Tanba iha momentu ne'e benefisiáriu sira ne'e mós laiha informasaun ida loloos, tanba tempu ne'e badak, sira-nia naran sai ba hodi hetan subsídiu.
"Ne'ebé la'ós totálmente sira ninia kulpa, maibé sira balu mós hatudu fali vontade atu fó fila ne'e, tenke apresia”, dehan nia. ( *)