Insidente ne’e mosu, tanba diskusaun entre feen ho la’en no la simu malu, mak ajente PNTL lori pistola karega no tiru sa’e ho intesaun ameasa.
Advogadu Rui Guterres, nu'udár defeza arguidu RA nian, haktuir kronolójia insidente ne'e mosu iha área Fatumeta besik eskola Universidade da Paz (UNPAZ) nia kotuk, iha sábadu loron (05/06) lokoraik.
“Kazu akontese iha loron sábadu (05/06) lokraik, arguidu dehan diskute malu ho nia kaben, dehan Polísia maute, tanba ne'e mak nervozu hasai pistola tiru sa'e ba leten”, informa defeza husi Arguidu, Rui Guterres iha TDD, Tersa (08/06).
Tanba prosesu inisiál ba kazu ne'e, parte Ministériu Públiku (MP) promove ho krime violénsia domestika ne'ebé previstu iha artigu 145 husi lei Kódigu Penal Timor-Leste nian.
Maibé, tuir prosesu alegasaun husi Ministériu Públiku sujere atu aplika pena prizaun preventiva ba arguidu, no parte defeza husu atu aplika de'it Termu Identidade Rezidénsia (TIR) ba arguidu.
Audiénsia ne'e prezide husi Juis turnu, Afonso Carmona, no parte Ministeriu Públiku reprezenta prokuradór Ricardo Leite, no arguidu hetan asisténsia legál husi Defensór Públiku, Rui Guterres. (*)