Login to your account

Username *
Password *
Remember Me

RENETIL Kondena Aktu Oknum PNTL, Husu Família Matebian Kolabora ho Justisa

Sekretáriu Jerál RENETIL, Joaquim da Fonseca 'Rusuo'. Sekretáriu Jerál RENETIL, Joaquim da Fonseca 'Rusuo'. Foto Suplay

Tempotimor (Dili)-Organizasaun Rezisténçia Nasional dos Estudantes Timor-Leste (RENETIL) kondena maka’as aktu ne’ebé komete husi oknum Polísia Nasional Timor-Leste (PNTL) hodi tiru mate sidadaun na’in-2 iha Lahane Osidental, sabadu (05/06/2021).

Maibé, husu mós ba família matebian Filomino de Deus no Camilo de Deus, atu kolabora ho justisa hodi evita espresaun violentu.

"RENETIL kondena makás aktu membru PNTL ne'e, ne'ebé uza forsa la-ho justifikasaun, no la'os iha kontestu hala'o nia servisu atu hametin lei no ordem”, dehan Sekretáriu Jerál RENETIL, Joaquim da Fonseca 'Rusuo', liuhusi karta komunikadu ne'ebéwww.tempotimor.com asesu iha segunda (07/06).

RENETIL kompreende emosaun husi komunidade no família vítima na'in-rua hasoru atu membru PNTL, maibé lamenta maka'as ba ekspresaun violentu husi parte komunidade, no medida ne’ebé la adekuadu husi PNTL atu prevene eskalasaun violénsia, ne'ebe rezulta iha danos, estragu sasán no hela fatin husi família autór nian.

"RENETIL apela ba komunidade tomak atu kalma no kontrola-an no fó fiar ba autoridade Polísia no instituisaun judisiária nian atu hala'o sira-nia servisu hodi hari’i justisa loloos iha kazu ne'e”, hateten nia.

Ho akontesimentu fatalidade ne'e fó hanoin hikas ba akontesimentu seluk ne'ebé molok ne'e mosu iha fulan-novembru tinan 2018.

"Bainhira mosu akontensimentu iha 2018, RENETIL halo diálogu ho Komandu Jerál PNTL nian, no identifika fatór balun ne'ebé bele sai hanesan kauza ba atu membru PNTL ne'ebé komete atu violentu, no medida saida mak Komandu PNTL no Governu presiza hola atu garante katak akontesimentu sira ne'e la mosu tan iha futuru", afirma nia.

Tanba ne'e RENETIL husu ba Komandu PNTL atu kolabora ho Ministériu Públiku (MP) hodi hala'o investigasaun ida profundu, imparsial no kredivel ba kazu ne'e hodi kontinua ho julgamentu atu estabelese justisa.

Komandu PNTL tenke hala'o investigasaun ida klean ba sirkumstánsia pesoál husi membru PNTL ne'ebé envolve iha kazu ne'e hodi identifika kondisaun psikolójiku ka kauza seluk ruma ne'ebé lori nia ba komete atu ne'e, hodi antisipa no evita akontesimentu hanesan iha futuru.

"Implementa ho rijidu regra no prosedimentu ba check-out no check-in kilat ba membru PNTL bainhira hahú no remata nia servisu loroloron, atu lalika lori kilat ba uma bainhira laiha nesesidade servisu nian, no aplika medida disiplináres ne'ebé forti bainhira iha infrasaun ba regra sira ne'e", haktenik nita.

RENTIL mós husu ba Ministériu Interior (MI) no Komandu PNTL atu estebelese mekanizmu hodi identifika problema psikolójiku ruma ne'ebé membru ruma hasoru tanba trauma iha pasadu ka tanba presaun husi servisu loroloron nian, no hola medida atu apoia membru sira ne'e hodi rekupera, atubele hala'o kna'ar didi'ak.

"RENETIL kontinua prontu atu servisu hamutuk ho instituisaun hothotu no sosiedade tomak atu hari’i Timor-Leste ida ne’ebé dame, iha ne’ebé lei sira aplika loloos no iha justisa ba ema hotu", hakotu nia. (*)

Rate this item
(0 votes)
Last modified on Monday, 07 June 2021 21:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter