Tempotimor (Dili)-Prezidente Tribunál Rekursu (PTR) Deolindo dos Santos rekoiñese orsamentu atu hari’i Tribunal Rekursu difikulta atu Hari’i Tribunál Distritál ba iha Munisípiu hodi lori justisa besik liu povu.
“Ita iha nesesidade ne’ebé mak ita hothotu akompaña dala barak ita hakarak justisa ne'e besik liu ba ita-nia populasaun sira, mais ita lakonsege lori to'o iha ne'eba tanba kestaun osan, distánsia”, hatete nia iha Parlamentu Nasional kuarta (5/5).
Ho kestaun orsamentu ne'e, Tribunal Rekursu dadaun uza de'it tribunal movél, maibé nia ezekusun ba despeza ne'e boot no la permanente.
Maibé iha mandatu foun ne'e, Tribunal Rekursu sei tau prioridade oinsá bele hari’i tribunal permanente ho ditánsia iha fatin tolu atu nune'e komunidade sira bele asesu kuandu iha kazu ruma.
“Ne'e mak hanoin hanusa mak atubele alarga tan tribunal permanente distánsia ne'e iha fatin tolu hanesan ne'e, ne'e mak ha’u-nia prioridade atu halo tempu badak nia laran, mais ida ne'e ita sempre ho apoiu mós husi ita-nia orgaun soberani sira”, hatete nia.(*)
