Tribunal atu halo julgamentu bá Eis-prezidente Federasaun Futebol Timor-Leste (FFTL), Francisco Kalbuadi Lay, inklui ema na'in-rua seluk, ne'ebé antes ne'e sira hamutuk komete kazu brankamentu kapitál.
Prokuradór Jerál Repúblika (PJR), José Ximenes hatete, dadaun ne'e sekretáriu Jerál Partidu CNRT, Francisco Kalbuadi Lay ninia paradeiru iha loos ne'ebé, parte Ministériu Públiku mós la hatene.
"Kalbuadi agora ba pasiar iha ne'ebé ha'u la hatene, orsida mosu iha Indonézia, orsida mosu iha ne'eba, ami haruka mandadu kapturasaun internasionál, Tribunal Distrital Dili dehan, laiha lei, Tribunal Rekursu mós dehan la iha lei”, dehan nia, hafoin reuniaun ho Prezidente Repúblika, Francisco Guterres ‘Lú Olo’, iha Palásiu Prezidensiá, tersa (23/03).
Pedidu husi Ministériu Públiku nian ne’e Tribunal dehan lei laiha atu haruka mandadu kapturasaun internasionál ne'e laiha atu halo kaptura ba Sekretáriu Jerál Partidu CNRT ne’e.
"Uluk kaer Tiago guerra ho fong fong, sira (Tribunal) dehan iha lei. Agora dehan laiha lei, prontu ita tuir de'it. Sáida mak ami halo, julgamentu separasaun. Ita julga uluk sira na'in-rua, husu bá Tribunal julga uluk ema sira ne'e, Kalbuadi hein mai mak ita julga nia”, haktenik nia. (*)