Nune'e, bele rekopera fali sira nia trauma no moe atu re-integra fali nu'udár sidadaun hodi kontribui ba dezemvolvimentu Timor-Leste nian.

Xefe bankada Fretilin, Francisco Miranda Branco hato'o lia hirak ne'e liu-husi konferensia imprensa, bazeia ba kazu abuzu sekxual ne'ebé eis-padre Dasbach halo ba labarik feto.

Atetude abuzu sekxual ne'ebé eis-padre refere halo ba labarik feto minoridade sira ne'e akontese iha uma Topu-Honis Oekusi ne'ebé nia rasik hari ho objetivu atu sai mahon ba labarik kbi’it la’ek no orfonatu sira.

Kazu ne'ebé eis-padre ne'e komete, dadaun iha ona prosesu justisa nia laran, tan ne'e governu mos presiza tau atensaun ba kazu ho modelu hanesan ne'e iha rai laran.

"Bankada FRETILIN rekomenda ba VIII Governu lideradu husi Primeiru Ministru, Taur Matan Ruak, atu presta apoiu nesessáriu ba vítima sira ho menoridade atu bele rekupera husi trauma, móe ho tauk, atu nune'é re-integra án hikas ihá sosiedade no kontribui nu'udár sidadaun ba dezenvolve Rai Doben Timor-Leste, ne'ebé hakribit ba hahálok violasaun, assédiu no abuzu sexual", dehan nia liu-husi husi deklarasaun politika iha plenaria PN, segunda (22/02/21).

Husu mos ba sosiedade tomak tenki hakribit abuzu sexual hasoru ita nia oan sira ho menoridade.

"Tanba, labarik vítima sira nia futuru nu'udár ema ka sidadaun, sei lori todan ida ne'é durante nia moris tomak atu hanesan ho ita nia funu na'in no maluk sira ne'ebé tó ohin loron sei rai metin kilat musan ihá sira nia isin lolon",Nia husu

Tinan 2018 ba kazu abuzu sexual nebé komete husi klero ihá Estados Unidos da América, Papa Francisco hakerek karta aberta nebé admite, “moe no arrepende” ba forma nebé Instituisaun Igreija rezolve krime ne'é.

Ihá loron 17 de Dezembru 2019 Vaticano publika dekreto hodi (aboli) suspende segredu pontifício ba kazu abuzu sexual husi parte membru klero nian, nu'udár medida ida hodi atende re-ivindikasaun husi vítima sira.

Medida ida né mós abertamente sei ajuda polísia no Instituísaun Jurídika sira bele hetan asesu ba informasaun lolós husi parte igreja.

Eis-Padre Dasbach moris iha loron 26 Fulan Janeiru tinan 1937 iha Pennsylvanian, Estadus Unidus Amérika (EUA) hahu tama lori misaun evanzelizasaun katolika ba rai Oekusi Ambeno iha tinan 1972 to’o tinan 2018. (*)