Diretór Jerál Sekretariu Estadu Formasaun Profisional no Empregu (SEFOPE) Paul Alves hateten, oras ne’e daudaun parte SEFOPE mos kontinua halo komunikasaun ho embaxada Timor-Leste iha Australia nomos ekipa SEFOPE nian ne'ebe estabelese iha Darwin.
''Ita halo komunikasaun ho ita nia embaxada iha Australia,nomós ami nia ekipa ne'ebé mak estabelese iha Darwin, iha semana kotuk sira halo komunikasaun ho sira, karta husi familia ninian ita haruka tiha ona iha ne'eba, ami mos husu ba sira maibe sira seidauk determina dehan bainhira, mak sira lori mate isin mai tanba sei iha prosesu investigasaun hela,''Paul hateten lia hirak ne’e iha knar fatin Edifisiu SEFOPE Caicoli Segunda (18/1).
Tanba seidauk determina tempu atu lori mate isin mai TL, maka parte SEFOPE mos sempre koalia no klarifila razaun sira ne'e ba familia matebian, iha edifisiu SEFOPE inklui mos iha uma.
''SEFOPE fo hatene ba sira katak iha prosesu ne'e, deklarasaun ne'ebé mak governu haruka ba ne'e iha ona prosesu investigasaun,'' nia esplika.
Masike prosesu ne'e atraza, maibe tuir nia, Governu Timor-Leste liu husi SEFOPE Espera katak prosesu investigasaun ne'e bele hotu lalais, para lori fila-fali mate isin mai, nune'e bele entrega ba nia familia.
Entretantu, trabalador Timoroan ne'e naran kompletu Tomás Pereira, idade 25, ne'ebe tuir programa Seasonal worker no serbisu iha toos ida iha Norte Tasmania, Austrália, hetan asidente tráfegu no mate fatin tanba hafoin kondus kareta baku fila iha natar ida ho naran Deloirane ne'ebé lokaliza iha territóriu Tasmania nian. (*)