Komisáriu KAK Sérgio Hornai hateten, husi tinan 2022 purvolta 73 kazus ne'ebe KAK halo investigasaun, iha 43 prosesu entrega ona ba Ministeriu Publiku atu halo finalidade ou hadi'a, no 30 kazu mak sei iha prosesu investigasaun, tanba mai ho ninia komplesidade.

Kazu ba krimi korupsaun ninian, liu-liu iha partisipasaun ekonomiku, abuzu poder, pekulatu ida ne'e mak sai kazu dominante, depende ba natureza KAK ninian, komforme lei numeru 8/2009.

"Involve liu-liu iha korupsaun ne'e konserteza autoridade sira ne'ebe mak iha poder, liu-liu iha lina ministeriais, nomos instituisaun estadu ninian", Sérgi hateten dadus ne’e hafoin sorumutu ho Primeiru Ministru, Taur Matan Ruak iha palasiu governu, Segunda (11/01).

Nia akresenta, KAK halo ona progresu lubuk ida ne'ebe hametin instituisaun, maske nafatin hasoru dezafius oin-oin.

"Ita halo progresu lubuk oan ida, liu-liu iha hametin dezemvolvimentu institusional, hametin ita nia servisu liu-liu iha koperasaun, hametin liu tan iha prosesu investigasaun kriminalidade ninian, iha tinan ida ne'e ita bele produs investigasaun lubuk oan ida ne'ebe halo selesaun ba ministeriu publiku, mesmu asin ita nafatin iha dezafius nomos obstakulu sira, eh ita presiza mos instituisaun halo melloramentu,” nia hateten. (*)