Prokuradór Jerál Repúblika (PJR), Jose da Costa Ximenes hateten, iha 101 kazu mak estadu sai vítima.
"Hanesan ita boot sira hatene iha fulan hirak liu-ba ami informa ba Prezidente Repúblika kona-ba funsionamentu servisu kontensiozu estadu ninian ke ita iha 101 kazu mak estadu hanesan parte vítima no hanesan autoneru iha prosesu sira-ne'e, iha 88 prosesu maka estadu hanesan reu ka hanesan tergugat", Nia informa hafoin hasoru-malu ho Primeiru Ministru Taur Matan Ruak iha Palásiu Governu, kinta (07/01).
Tanba ne'e mak PJR informa ba Primeiru Ministru haree didi'ak área ida-ne'e nune'e servisu hamutuk ho Ministériu Públiku didi'ak para reforsa Ministériu Públiku ninia pozisaun bainhira defende estadu nia intrese iha tribunál sira.
"Kona-ba kestaun defeza ne'e Ministériu Públiku sempre koopera ho governu husi dokumentasaun informasaun hotu, governu fornese ba gabineti kontensiozu estadu hodi sai hanesan prova dokumentu suporta bele defende estadu nia interese, ha'u hanoin ne'e prosesu dalaruma ita ko'alia ne'e simples, mais bainhira defende estadu nia interese ne'e ita tenke koordenasaun di'ak no forsa", nia akresenta
Nia husu governu kontinua reforsa bainhira pedidu ruma tama iha instituisaun estadu fahe informasaun didi'ak kompletu mai para bele nafatin reforsa hodi labele lakon iha tribunál sira.
"Hodibainhira ha'u dehan tiha ona katak, iha área ida ne'ebe maka'as liu, barak liu asaun kontra estadu mak iha Ministériu Finansa área reseita ninian, depois mai iha Ministériu Justisa, t Terars no Propriedade nian ne'e maka ema barak liu asaun kontra estadu iha-ne'ebá, tantu hanoin iha sira seluk tan Komisaun Funsaun Públika ba desizaun sira prosesu disiplinár ne'ebé ema balun rekorre ba tribunál administrativu para haree", nia afirma
Nia dehan, maioria parte a-favór ba estadu, maibé estadu sempre lakon, tanba laiha razaun fundamentál, nune'e halo esforsu atu servisu hamutuk di'ak liután hodi defende intrese estadu.
"Maioria parte a-favór ba ita, mais barak mós ita lakon, tanba ita estadu laiha razaun, tanba ida-ne'e mak ami hanoin presiza reforsa nafatin ita nia kooperasaun", nia relata
PJR aproveita opurtunidade ko'alia ho Primeiru Ministru Taur Matan Ruak, kona-ba atualizasaun ba kuadru pesoa ofisiál justisa ne'ebé haruka kleur ona, maibé sidauk hetan solusaun.
Nune'e, Primeiru Ministru hato'o resposta katak, sei halo esforsu hodi haree ba kestaun ne'e.
"Primeiru Ministru ohin hato'o katak, sei halo esforsu hotu-hotu para oinsá bele kria koordenasaun ida- ne'ebé di'ak entre Gabineti Prokuradoria Jerál ninian servisu kontensiozu estadu ho liña ministeriál sira para bele reforsa ita- nia koperasaun ba asuntu defeza interese estadu iha tribunál sira", nia hakotu. (*)