Câmara de Contas hahú ke’e tuir abut husi polémika ne’e tanba, dokumentu komprovativu balun hatudu katak, antes ne’e jetty ne’e finansia ho orsamentu estadu ne’ebé konsidera projetu ne’e nu’udár proriedade estadu iha kontrolu empreza públiku Timor Gap.
Alende ne’e, Câmara de Contas mós hakarak atu ke’e tuir abut tanba, oras ne’e daudaun, jetty ne’e la’ós ona propriedade estadu nian, maibé sai ona propriedade ba empreza Esperansa Timor Oan (ETO), Lda.
www.tempotimor.com konsege asesu dokumentu auditoria husi Tribunál Câmara de Contas ho númeru TR/CContas/2020/511 no mós númeru processo 01/2019/AUDIT-S/CC.
Iha dokumentu ne’e ho nia asuntu; auditoria husi konformidade fornesimentu konbustivel ba sentru elétrika Hera ho Betanu ba periudu 2013 to’o 2019.
Iha dokumentu auditoria ne’e Câmara de Contas deskobre katak, iha novembru 2014 kontratu ne’e asinadu husi Ministru Obras Publikas (MOP) ho G&S, Lda ne’ebé selebra kontratu ne’e atu halo dezeñu no konstrui Jetty Terminál iha Hera ho valór osan $13.827.651,11.
Kontratu ne’e, antes ne’e haruka duni ba Câmara de Contas (CdC) hodi halo fiskalizasaun husi Comisão Nacional Aprovisionamento (CNA), iha 30 janeiru 2015, ho klarifikasaun ne’ebé tribunál ne’e husu iha loron 3 fevereiru 2015.
Kontratu ne’ebé iha la realiza no la ezekuta, inklui infraestrutura ne’ebé mensiona iha kontratu ne’e ne’ebé konstrui iha tinan 2016, sai fali propriedade empreza Esperança Timor Oan (ETO), Lda.
“Ho kestaun iha leten, ha’u husu ba exelénsia, katak, tuir akordu ne’ebé hatuur iha artigu 8 konstituisaun númeru 9/2011, loron 17 fulan agostu ne’ebé sai hanesan baze ba estabelesimentu Câmara de Contas, husu ona ba ministériu refere atu haruka dokumentu sira ne’e ba tribunál iha loron 4 fulan fevereiru 2015 ho prazu loron sanulu resin lima (15),” Juis ne’ebé asina dokumentu auditoria ne’e hateten, iha karta ne’ebé www.tempotimor.com asesu.
Kona-ba asuntu ne’e www.tempotimor.com koko ona hodi halo konfirmasaun ba parte empreza ETO, Lda maibé infelizmente na’in ba kompañia ne’e lakohi fó komentáriu. (*)
