Ohin loron sábadu 05 fulan dezezembru tinan 2020, tribunal hatun despaisu katak, Eis-Prezidente Komisaun Funsaun Publika LP durante fulan 6 nia laran labele halo viajen ba estranjeiru.

"Foin mak rona despaisu juis nian ne'ebé prefere simu promosaun Ministeriu Públiku nian iha artigu 192 kona-ba proivisaun atu sai, maibé juis indefere pedidu ida husi ministeriu publiku 187 kona-ba kaosaun ne'e dehan katak, arguidu iha obrigasaun atu depozita rihun $50 hanesan garantia ba estadu, tanba haree ba Ministeriu Publiku ladun fundamenta koasaun ida ne'e. Entaun, parte tribunal indefere pedidu ne'e", defensor publiku Sergio Quintas dehan iha TDD Bebora, Sábadu (05/12).

Nu'udar mandatari husi Eis-Prezidente Komisaun Funsaun Publiku LP nian, sei haree despaisu juiz nian ne'ebe aplika kona-ba medida koasaun proivisaun de auzensia.

"Ami sei haree, se karik despaisu ida ne'e, viola regras balun ne'ebé estabelese kodigu prosesu penal iha 15 dias sei halo rekursu kontra despaisu ne'e. Tanba, ita hatene arguidu ne'e, nu'udar kolaborador ba justisa, tanba arguidu obedese nia direitu nu'udar sidadaun, kuandu ministeriu publiku nu'udar autoridade bolu dala rua ba iha ministeriu publiku nia kumpri", nia esplika.

Nia hatutan, maibe, tanba de'it, ministeriu publiku haree katak, nia dezlokasaun ba estranjeiru ne'e, impede ministeriu publiku nia serbisu, entaun ida ne'e mak ministeriu publiku hakarak hasa'e medida ko'asaun mais todan liu.

"Husi ki'ik ba fali medida ko'asaun proivisaun audensia par labele sai husi teritoriu timor nian, mais nu'udar mandatari haree limiti ona liberdade arguidu nian, tanba arguidu ida ne'e ita sei konsidera hanesan inosenti, tanba tenke konsidera nafatin prinsipiu prosusaun da inusensia, ne'ebe estabelese mos iha konstituisaun rasik artigu 34, nomos iha kodigu prosesu penal, entaun ida ne'e mak hanoin ami sei hare despaisu ida ne'e, fundamenta di-diak ou lae", nia dehan.

Nia haktuir, tribunal indefere pedidu husi ministeriu publiku nian kona-ba koasaun, tanba la fundamenta di-diak ho razaun.

Maske ho situasaun ne'e, maibe arguidu LP kontinua hala'o ninia serbisu ou atividade hanesan bai-bain, tanba kazu daudaun ne'e foin prosesu inisiu atu haree medida ko'asaun ne'ebe atu aplika, seidauk tama ba iha prosesu komum atu haree privadu no la provadu promosaun Ministeriu publiku nian.

"Entaun ita bele konsidera arguidu sei inosenti, nia bele halo knaar hanesan bai-bain, ne'e la'os akontese de'it iha Timor, maibe iha fatin-fatin uma vez medida ko'asaun ne'e la'os desizaun", nia tenik.

Nia hatutan, nu'udar mandatari la aseita despaisu ne'e, tanba nia parte halo ona promosaun liu-husi primeiru interogatoriu kona-ba manutensaun ba TIR, maibe juis la simu promosaun ne’e, entaun ladun justu, nune'e iha loron 15 sei haree par halo rekursu ba despaisu juis nian.

Suspeitu LP tuir julgamentu primeiru interogatoriu iha tribunal, tanba deskonfia envolve iha kazu krime partisipasaun ekonomia liu-husi negosiu ne’ebé kontra Kódigu Penál artigu 299 kona-ba ninia envolvimentu partisipasaun ekonomia bainhira asume knaar nu’udár Prezidente KPF iha tinan 2017. (*)