Segundu komandante PNTL Munisípiu Dili Superintendente Euclides Belo hateten, suspeitu JDA libre ona, tanba ne'e PNTL kontinua buka tuir autór prinsipál ne'ebé oho matebian Ernesto.

"Ba kazu omesidu ne'ebé akontese iha Taibesi mak PNTL suspeita JDA bazeia ba informasaun sira ne'ebé sasin fó iha suspeitu rua. Maibé, ita konsege kaptura suspeitu inisiál JDA iha Tasi-Tolu, depois ita detein durante oras 72. Ne'ebé desizaun horisehik sai katak, provizóriu nia libertadu, entaun ita hein mandadu husi tribunál ba autór prinsipál ne'ebé oho matebian Ernesto dos Santos," Segundu komandante PNTL Munisípiu Dili, Superentendente Euclides, hateten ba jornalista iha nia servisu fatin, Kuarta (2/12).

Komandante ne'e afirma, suspeitu ne'ebé libre ona ne'e nia estatutu sei determina, bainhira mandadu husi tribunal sai ona hodi halo kapturasaun ba autór prinsipál ne'e, tanba autór prinsipál ne'e nia identidade PNTL aposta ona.

"Bainhira mandadu sai, PNTL kumprimenta para lori autór ne'e ba prosesu," Euclides dehan.

Entretantu kazu ne'e akontese iha merkadu Taibesi iha loron (28/11) madrugada ne'ebé rezulta matebian Ernesto dos Santos lakon vida.(*)