Ezijensia ne’e PR Lú Olo hato’o, hafoin Prokuradór Jerál da Repúblika (PJR) José da Costa Ximenes hala'o audiénsia ho Xefe estadu iha Palásiu Prezidensiál Bairru-pité, ohin.
"Prezidente Repúblika nia mensajen hateten, MP favór, tenke iha korajen atu enfrenta kriminalidade organizada, tanba nia atinje kualkér pesoa no sosiedade. Entaun, presiza ema korajen," PJR José ba jornalista sira, Segunda (16/11).
Haree ba mensajen PR nian ne'e, PJR agradese tanba apoiu nafatin MP hodi luta kontra krime sira.
"Ami agradese tebes ba Prezidente Repúblika tanba nafatin suporta ami atu kontinua halo esforsu ida ne'e," nia hateten.
PJR mós husu ba média komunikasaun sira atu hamutuk ho órgaun judisiál sira hodi kombate krime sira ne'ebé fó perigu ba ema no sosiedade.
"Mai ita hamutuk, média liu-liu ha'u haree TVTL, GMN no jornal sira ne'ebé sempre fó sai, entaun ita hamutuk luta kontra kriminalidade organizadu, tanba ne'e balun atinje ita-nia familia, maibé barak liu mak atinje ita-nia sosiedade," José husu.(*)
PUBLISIDADE