Asaun pasífiku ne’e halo ho dada mós espanduk, lori Krúz nu’udar asaun protesta ida hosi Igreja Katólika tanba la simu desizaun Tribunál Distritál Dili nian ne’ebé notifika Arsebispu Metropelitana Dili, Don Virgilio do Carmo da Silva, ho ho Lider Karismátiku, Kay Rala Xanana Gusmão sai nu’udar sasin ba kazu ne’ebé hato’o hosi Organizasaun Naun Govermentál (ONG) JU,S ba Ministériu Públiku.
Spanduk ne’ebé dada iha Tribunál Distritál Dili nia oin, hakerek, liafuan, “Arsebispu Sala Saida! Defende Lia Loos Ne’e Knaar Kreda Nian. Ami La Simu Lori Amu Bispu mai Tribunál Hanesan Kriminozu”.
Hafoin Reza Tersu, Amu Maubere hateten, Igreja lamenta tebes, bainhira Igreja ‘defende lia loos no defende direitu labarik sira nian, tenki ba hatan fali iha tribunál.
“Viva Igreja Katolika”, Amu Maubere hamutuk ho sarani sira hakilar nu’udár asaun solidaridade, ba Amu Arsebispu, Amu Hermínio Gonçalves no Kay Rala Xanana Gusmão.
Entretantu, Arsebispu Don Virgilio, Xanana Gusmão no Padre Herminio (Eis Prezidente Komisaun Justisa no Paz) simu karta notifikasaun husi Tribunál hodi hatan no sai sasin ba keixa hosi Organizasaun Naun Govermentál
“JU,S” kona-ba relatóriu investigasaun ne’ebé halo hosi Komisaun Justisa no Paz ba kazu labarik na’in 30 ne’ebé sai vitima problema ida iha Oecusi.
Labarik sira ne’e antes ne’e hela iha uma Mahon Topu Honis ne’ebe jere husi padre SVD ida no Vatikanu hasai ona husi padre tan ba deskonfia konete abuzu sexuál hasoru minor idade.