"Ha'u seidauk rona informasaun, ne'ebé ha'u labele fó komentáriu ba ida ne'e, depois mak ita haree," Naimori Bucar hatetetn asuntu ne’e iha Palásiu Prezidensiál bairru-pite, Dili, Segunda (26/10).
Maske Konselleiru másimu KHUNTO seidauk hatene, maibé deputada Olinda antes nee deklara tiha ona katak, nia prontu koopera ho justisa.
"Momentu ne'ebá ema ataka malu, ha'u iha hela servisu fatin, hafoin ema ne'e hakilar deputadu sira hotu na'ok-ten, mak ha'u kesar, ko'alia de'it ba ha'u mesak karik di'ak, maibé ko'alia deputadu hotu na'ok-ten ne'e mak ha'u kesar," dehan deputada ne'e iha (18/10).
Nia mós afirma, prontu koopera ho justisa, tanba ne'e responsabilidade.
"Komisaun A husu atu ha'u atu hakerek de'it karta ba tribunál maibé ha'u lakohi, ha'u hakarak hasoru tribunál, tanba ha'u mak kesar, ha'u lakohi hanesan sira seluk, tanba tuir lei, ita hotu iha lei nia okos. Atu kiik ka deputada, tenke hatudu oin iha ne'ebá," katak nia.
Entretantu pedidu ne'ebé lider bankada sira aprova tiha ona hodi hasai imunidade ba deputada Olinda Guterres iha loron (16/10) ne'e ho númeru 215/V (3a) ne'ebé fixa ba loron (19/10) hodi hasai imunidade ba deputada ne'e sei halo votasaun liuhusi periodu antes ordem do dia, maibé lakonsege akontese, nune'e adi'a ba tempu tuir mai.
Alende ne'e, bainhira PN hasai ona imunidade ba deputada bankada KHUNTO ne'e, nia sei presta deklarasaun iha loron (18/11) fulan oin durante oras rua nia laran.