Iha 6 Outubru foin lalais, TDD liu husi ninia desizaun final aplika pena prizaun tinan lima to’o tinan 9 ba arguidu sira ne’ebé envolve iha falsifikasaun dokumentus veteranus nian.
Ema hirak ne’ebé TDD kondena mak, Joaquim Silva "Mate Restu", Osvaldo Paulo, Délio Jesus Kampus, Mário de Araújo, Domingos Mendonça, Marcelino Pereira, Agostinha da Costa Maria, Celio Noronha Lay no Costantinho de Jesus Maia.
Arguidu sira ne'e balun servisu nu'udar funsionáriu iha Ministériu Solidariedade Sosiál no Inkluzaun (MSSI), Sekretáriu Tékniku Administrasaun Estatál (STAE), Komisaun Omenajen, no Banku Nasionál Ultramarinu (BNU).
"Ha'u labele ko'alia ona, tanba lei iha ona, se mak falsifika, nia hasoru lei, hanesan foin lalais ne'e dehan kaer ona na'in haat ka lima, ne'ebé ba kadeia tinan lima ka neen, konfirme lei mak kondena," dehan Maijor Jenerál Lere iha Palásiu Prezidensiál Bairru-pite, Dili, Kuarta (21/10).
Molok ne’e, Prokuradór Jerál Repúblika (PJR) José da Costa Ximenes fó hanoin atu hadi'a lei hodi hasai direitu veteranu ne'ebé komete asaun korrupsaun.
"Veteranu sira ne'ebé gosta falsifika dokumentu ne'e, devia hadi'a lei hodi nune'e hasai tiha sira-nia direitu tanba falsifika dokumentu, kazu ne'e grave," dehan PJR.
Entretantu, aleinde pena prizaun, tribunál mós sei ejize ba arguidu sira atu selu indeminizasaun sivíl ho valor rihun $93.547.