Tuir Prezidente Tribunál Rekursu (PTR) Deolindo dos Santos katak, TR presiza prepara aan hodi hakat ba faze implementasaun Lei Médida Prevensaun no Kombate Korupsaun nian, tanba lei ne'e nia konsekuénsia boot liu diploma atuál ne'ebé vigora hela.
"Preparasaun ne'ebé TR presiza halo hodi fó koñesimentu di'ak ba juis sira, auditór sira, inklui dirijente apoiu servisu sira, kona-ba oinsa mak atu halo deklarasaun tuir ita-nia lei foun ne'ebé kona-ba kombate korupsaun nian," dehan Prezidente TR Deolindo dos Santos hafoin remata enkontru ho PR Lú-Olo iha Palásiu Prezidensiál bairru-pite, Dili, Tersa (20/10).
Prezidente ne'e afirma, formasaun ba juis sira kona-ba lei foun ne'e sei hala'o iha fevereiru 2021.
"Data fixu ona para fó formasaun ba juiz sira iha 12 Fevereiru 2021 ne'ebé hela semana ida para lei ne'e vigora, tanba lei ne'e sei vigora iha 22 Fevereiru 2021," nia dehan.
Alende husi formasaun ne'e iha mós semináriu boot ida ba dirijente servisu sira, ofesiál justisa no auditória sira iha Tribunál Rekursu, tanba lei ne'e obriga ka define katak hotu-hotu tenke deklara nia riku soin.
"Lei ida ne'e nia konsekuénsia ne'ebé diferénsia totál husi diploma atuál ne'ebé regula kona-ba deklarasaun interese ne'ebé membru governu sira halo iha tribunál no Tribunál Rekursu rasik," nia tenik. (*)