Print this page

PR Lú-Olo no PJR Lansa Livru Protesaun ba Minor no Vítima Sira

By October 11, 2020 1837
PR Francisco Guterres Lu Olo ho PJR Jose da Costa Ximenes lanca livru Protesaun Minor iha edifisiu MF aitarak laran Dili PR Francisco Guterres Lu Olo ho PJR Jose da Costa Ximenes lanca livru Protesaun Minor iha edifisiu MF aitarak laran Dili Foto Midia PR

PR Lú-Olo no PJR Lansa Livru Protesaun ba Minor no Vítima Sira

Tempotimor (Dili)-Iha ezisténsia Ministériu Públiku (MP) ba tinan 20, Prezidente Repúblika (PR) Francisco Guterres Lú-Olo no Prokuradór Jerál da Repúblika (PJR) José da Costa Ximenes mós halo lansamentu ba livru ne'ebé ko'alia kona-ba protesaun minoridade no vítima sira.

Livru ne'ebé hetan lansamentu husi PR no PJR ne'e ho nia títulu "Ministériu Públiku protesaun ba familia no minor iha kontestu Timor-Leste".

Iha lansamentu livru ne'e PR Lú-Olo dehan, kontinua fiar metin no enkoraja MP ninia majistradu sira, ofisiál justisa sira, majistradu sira no operador judisiáriu sira inklui operador rede kolaborasaun ba proteje menor sira no família atu kontinua hala’ o servisu di’ak ne’e.

"Imi-nia dedikasaun sei kontribui ba harii sosiedade dame no moris di’ak, hases an husi prekonseitu no dezigualdade sosiál, livre husi diskriminasaun, livre husi violénsia hasoru feto no labarik, livre husi violénsia kriminál ho forma ne’ebé de’it," katak PR Lú-Olo iha nia diskursu ba lansamentu livru ne'e, Sesta (9/10).

Iha fatin hanesan PJR José da Costa Ximenes mós dehan, obra ne'ebé iha ne'e nu'udar baze esperiénsia MP nian, iha matéria defeza ba ema vulneravél sira.

"Liu-liu ba labarik sira, vítima husi deskuidu ba violasaun no esplorasaun nomós ba feto sira ne'ebé sai mós vítima iha uma laran ka violénsia doméstika, ne'ebé promove ona iha servisu prokuradoria ba familia," dehan PJR.

Nia mós dehan, MP koñesidu liu ho nia papél nu'udar titulár ba asaun penál, maibé MP mós iha funsaun ne'ebé barak teb-tebes.

PJR mós afirma, iha protesau ba direitu labarik no vítima sira sei iha dalan ne'ebé dook teb-tebes, maibé PMF hetan esperiénsia lor-loron, nune'e PMF bele halo servisu liután ba sira ne'ebé frazilidade liu.

Entretantu livru ne'e esplika buat tolu ba entidade hotu maka hanesan, promove MP nia servisu iha área sira ne'ebé ladun hetan atensaun husi públiku tanba la sai husi komunikasaun sosiál sira. Livru ne'e mós sei sai livru traballu ba majistradu sira, liu-liu sira ne'ebé servisu iha prokuradoria minor no familia no ikus liu mak livre ne'e sai hanesan intrumentu ba entidade sira ne'ebé luta ba direitu labarik no familia nian.(*)

Rate this item
(0 votes)
Last modified on Sunday, 11 October 2020 16:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items