Tempotimor (Dili) - Haree ba sidadaun sira ne'ebé kontinua ultrapasa ilegál iha fronteira rai hodi ba sa'e sintu iha Indonézia, maka daudaun ne'e Polísia Nasionál Timor-Leste (PNTL) no Ministériu Interiór (MI) kontinua halo investigasaun hodi lori prosesu sira ba Ministériu Públiku (MP).
Tuir Vise-Ministru Interiór, António Armindo, sidadaun sira ne'ebé tama ilegál ne'ebé kaptura ona no kuarentena ne'e, kuandu kompleta ona sei lori prosesu ba MP.
"Sidadaun sira ne'ebé tama ilegál ne'e liu 300, ne'ebé agora loron-loron ita kontinua kaer, balun sei tama sai nafatin, ne'ebé númeru loloos ne'e ita labele ko'alia katak hanesan ne'e, maibé agora ne'e kontinua akontese. Ne'ebé to'o semana oin hanesan ne'e bele to'o 400 hanesan ne'e," dehan nia, iha Komandu Jerál PNTL, Kaikoli, Tersa (29/9).
Nia afirma, sira ne'ebé tama sai ilegál ne'ebé kapura ona ne'e kuandu kumpre ona kuarentena, maka PNTL iha papél depois halo investigasaun no entrega ba na’in, tanba MP mak na'in loloos.
Governante ne'e mós dehan, bainhira forsa kaptura, seidauk bele halo investigasaun, tanba la hatene ema ne'e moras ka lae? Entaun kumpre lai kuarentena maka foin halo investigasaun no lori ba MP.
Iha fatin hanesan, Komandante Jerál PNTL Komisáriu Faustino da Costa hateten, daudaun ne'e sidadaun na'in 100 resin mak livre ona husi kuarentena.
"Ita halo hela identifikasaun, la'ós Komandu Munisípiu Dili de'it, maibé kuaze ema na'in 100-resin ne'ebé Ministériu Saúde liberta ona, entaun halo hela prosesu identifikasaun ba sira hotu liuhusi servisu identifikasaun PNTL no servisu investigasaun Munisípiu Dili. Agora ita kontinua rejistu, desizaun ne'e iha Ministériu Públiku (MP) nia liman, tanba sira mak na'in prosesu ne'e," nia dehan. (*)