"Iha futuru ita labele mantein ho situasaun tribunál movel nafatin tanba kustu boot tebes, entaun ita tenke iha planu ne'ebé permanente ba futuru. Tanba ne'e, mak ko'alia ho Primeiru Ministru para mantein nafatin iha Orsamentu Jerál Estadu (OJE) 2021 aumenta iha ami-nia proposta orsamentu atu oinsá alarga tan distribui judisiál tribunál balun iha fatin ne'ebé ami indika ona", dehan PTR, Deolindo do Santos, hafoin hasoru-malu ho Primeiru Ministru, Taur Matan Ruak, iha Palásiu Governu, Kuarta (12/08).

Tuir nia, ho forma tribunál movel ne'ebé daudaun iha ne'e mak lori besik justisa ba komunidade, tan ne'e ba oin presiza halo planu ida ne'ebé permanente mak tuir planu sei loke tan tribunál iha munisípiu.

"Ho forma ida ne'e (tribunál movel) mak lori justisa besik ba komunidade no bele halo justisa ne'ebé lalais liután, maibé forma ida daudaun ne'e temporaria. Tan ne'e, iha planu atu halo permanente mak atu loke tan tribunál iha fatin balun ne'ebé identifika ona", tenik Nia.

Nia dehan, fatin ne'ebé identifika ona atu loke tan tribunál maka Munisípiu Vikeke, Ermera no Bobonaru.

Razaun loke uluk tribunál iha fatin tolu ne'e, tanba sira iha ona delegasaun ministériu públiku, entaun bele fasilita servisu.

Nia informa, kestaun atu halo permanente ba tribunál movel mak Primeiru Ministru, Taur Matan Ruak, hato'o ona ba Ministériu Finansas no agora tekniku sira diskute hela para aumenta osan ba tribunál permanente no tribunál movel ne'ebé la'o hela. (*)