Ministru Salvador hato’o kestaun ne’e relasiona ho ninia asaun ne’ebé sai husi odamatan kotuk edifisiu MP iha Kuarta (29/07) hafoin presta deklarasaun.

"Kona-ba ida horseik ne'e hanesan sidadaun ida di’ak hakarak kopera ho justisa, ha’u ba iha ne'eba kontribui ba prosesu justisa no prosesu justisa rasik iha segredu. Horseik ita-boot sira rona rasik husi prokurador titular kona-ba prosesu ne'e katak, iha segredu justisa, tanba ne'e ha’u hanesan ema sidadaun di’ak ida ne'ebé ema hotu-hotu iha lei nia okos, hakarak kontribui ba prosesu ne'e rasik, segredu ne'e mak horseik la ko'alia ho ita-boot sira," dehan Ministru Salvador hafoin hasoru-malu ho Primeiru Ministru Taur Matan Ruak iha palasiu governu, Kinta (30/07).

Hatan ba tanba sa mak Ministru Salvador sai fali husi odamatan kotuk edifisiu MP, Ministru ne’e hatan katak, tanba prosesu justisa ne’e segredu.

Kona-ba kazu ne’ebé lori nia ba presta deklarasaun iha MP, Ministru dehan, ida ne’e laiha ligasaun ho mandatu ne'ebé dadaun nia asume hanesan Ministru Obras Publika.

"Ne'e sei prosesu justisa, loloos ha’u labele ko'alia sasan sira ne'e, komu ita-boot sira husu ha’u halo espekulasaun, se ita-boot sira haree iha online tempotimor hanesan kazu Funsaun Publika ne'e la liga ho ha’u-nia mandatu hanesan Ministru," nia dehan.

Nia esklarese, horseik nia presta deklarasaun iha MP relasiona ho kazu anterior bainhira nia sei sai nu’udar konsultor kompaña.

"Se ita-boot sira haree karik kazu tuan ida iha momentu ne'eba ha’u hanesan kompañia konsultor ne'ebé lori prosesu ba tribunal kontra governu, ida ne'e mak ha’u bele fó hatene par bele fó informasaun ne'ebé detallu ba prosesu tomak ne'e mak horseik ba.”

Maske nune’e, nia afirma, nia labele esplika liu tan ka fó liu tan informasaun tanba justisa mós iha ninia segredu rasik.

"Atu ko'alia liu tan ita-boot sira hein prosesu justisa ne'e rasik, orsida ha’u la kontribui fali ba prosesu ida segredu justisa ne'e, ha’u hanoin ita hein rezultadu husi investigasaun," dehan nia.