Tuir observasaun jornalista www.tempotimor.com, Ministru Salvador to’o iha edifisu MP iha tuku 08.30 dader, hafoin tama ba sala hodi presta deklarasaun iha tuku 09.01.
Ho prezensa husi Ministru Salvador ne’e, jornalista sira husi media nasional sira hein hodi bele hetan komentariu balun kona-ba ninia prezensa iha MP.
Maibé, to’o iha tuku 14.14, Ministru Salvador ladauk mosu.
Ofisial justisa ida ne’ebé hanoin jornalista hein buat mamuk ida, hakbesik an ba jornalista sira hodi informa katak Ministru Salvador fila ona iha tuku 12.40.
"Ministru ba tiha ona. Duke ita halo terus malu kolega sira, ministru ba tiha ona," dehan pesoal justisa ne’e.
Tuir informasaun husi pesoal justisa seluk, Ministru Salvador sai husi edifisiu MP husi odamatan kotuk iha tuku 12.40 ka 12.50.
"Ministu ba tiha ona sa, nia kala ba iha tuku 12:40, lae 12:50 hanesan ne'e. Ohin nia karreta pajero metan ida par iha ne'e, nia sai tiha husi kotuk," dehan fonte ne’e.
Tuir informasaun ne’ebé www.tempotimor.com asesu, Ministru Salvador hetan notifikasaun husi MP hodi presta deklasaun kona-ba kazu edifísiu foun Komisaun Funsaun Públika (KFP).