Planu ida ne’ebé ho termu judisial nian bolu “Rejime Aberta” ba Prizioneiru sira ne’e MJ hahú hanoin relasiona ho espasu iha prizaun, liu-liu prizaun Bekora, ne’ebé hahú kloot ba beibeik.
"Ba futuru ita sei haree oinsa par aplika Rejíme Aberta ne'e hodi ema bele ba serbisu iha liur, bele tama mai fali kumpre pena prizaun. Oras rua nia bele ba iha li’ur serbisu, hanorin, eskola, labele buat hotu-hotu tau iha ne’e de’it depois sira-nia futuru la klaru," dehan Edmundo ba jornalista sira iha prizaun Bekora, Kuarta (29/07).
Visé Ministru Justisan José Edmundo Caetano hatete, tuir loloos kapasidade prizaun Bekora akumula de’it prizioneiru na’in 250, maibé daudauk ne’e prizioneiru ne’ebé hela iha Prizaun Bekora sa’e to’o na’in 591.
"Tanba ne'e, ba oin ha'u sei halo programa ida ne'ebé moderniza prizaun ne'e ho di'ak ba futuru joven sira ne'ebé mai kumpre pena iha prizaun iha ne'e, sira bele halo mós serbisu seluk iha liur," nia afirma.