"Ami rekomenda atu hadia no mos kontinua akompaña prosesu sira ne’ebé la’o iha Tribunal", dehan nia, iha salaun Ministeriu Solidariedade no Inkluzaun Sosial (MSIS), Kaikoli, Sesta (23/11).

Tuir nia, sistema judisiariu iha Timor-Leste aspetu balun presiza atu Estadu kontinua nafatin halo investimentu liuliu iha area formasaun judisiariu.

Tuir Luis, numeru autor justisa sira seidauk sufsiente atu bele responde ba nesesidade justisa povu nian.

"Juis na’in tolu nulu, prokuradór na’in tolu nulu, Ministériu Publiku na’in tolu nulu no defensór públiku na’in hitunulu resin, maibé numeru ne'e uitoan de’it mak prátika iha tribunal", dehan nia.

Nia hatutan, ho numeru ne’e seida’uk reprezenta nesesidade justisa povu ninia, tanba ne’e kazu barak pendente, kazu sivil la julga.

Ne'e duni presiza esforsu makaas liu, investimentu makaas iha sentru formasaun judisiariu, preve mekanizmu formasaun judisiariu ne’e atu mobiliza timoroan barak, judisiariu sira bele asesu ba formasaun ne’e.