"Bainhira governu deside fila fali dehan katak ha’u komandante jeral laiha kapasidade, prontu para ona iha ne’e. hau simu ohin hau entrega", dehan Komjer PNTL, Komisariu Julio Hornai, hafoin soru-mutu ho Prezidente Republika, iha Palasiu Prezidensial, Bairru-Pite, Tersa (20/11).
Nia hatutan, bainhira Governu deside hapara mandatu eis-komandante Akademia PNTL ne'e, prontu atu kumpre.
Entretantu, Xede Estadu rasik lamenta tebes ho atetude pesoal PNTL nian tanba uza kilat la tuir prosedura no regra sira ne’ebé iha.
Julio Hornai haktuir deklarasaun husi PR Lu Olo katak, uza arma tuir nesidade ne’ebé atus krime ne’e mosu, maibe iha ne’ebá la’os krime boot ne’ebé tenke uza ida ne’e.
Ne'e duni, Komjer PNTL rekoñese kazu ne’e halo moe tebes instituisaun nia prestijiu, tanba ne'e komandu foti médida forte ba ajente sira ne’ebé hakarak koko uza ekipamentu estadu nian tuir ida-idak nia hakarak.
Relasiona ho trajedia Kuluhun, Tribunal Distrital Dili (TDD) hahu ona primeiru interrogatoriu, iha Segunda-feira lokraik (19/11) no kontinua fila-fali iha loron Tersa-feira (20/11) tuku 10:00 dader.