Print this page

TL Ameasadu Selu Besik Millaun $500 ba Empreza husi Australia

By December 10, 2019 6798
Palasiu do Governu Timor Leste Palasiu do Governu Timor Leste Foto Tempo Timor Arkivu

Tempotimor (Dili)-Timor Leste ameasadu atu selu osan hamutuk kuaze besik millaun $500 ba kompaña ida husi Australia, Lighthouse Corporation, wainhira  kompaña manan iha Tribunal, hafoin Supremu Tribunal Australia nian rejeita argumentu rekursu husi governu Timor Leste ne’ebé kesiona kompetensia Australia hodi realiza julgamentu ba kazu ne’ebé Lighthouse levanta.

Empreza husi Australia ne’e hato’o keixa hasoru governu Timor Leste, tanba governu TL kansela kontratu kona-ba fornesimentu mina no jeradór ba TL ho Lighthouse ne’ebé asina iha 2010.

Ho kanselamentu ida ne’e, Lighthouse hato’o keixa ba tribunal Australia hodi halo julgamentu no ezije governu TL selu prejuizu ba kompaña ne’e hamutuk millaun $328, ho jurus no kustus, ne’ebé bele atinze to’o bwaik millaun $500 resin.

Responde ba keixa ne’e, governu Timor Leste hato’o rekursu ba Supremu Tribunal Australia hodi koko atu trava prosesu julgamentu.

Governu TL ne’ebé reprezenta husi Advogadu husi DL Piper, hatete Tribunal Supremu Vitoria (Australia) laiha jurisdisaun hodi rona kazu, tanba konsidera iha hela kauza "Atos Estadu", husi instituisaun ne'ebe antes ne’e fórum inapropriado ba rezolusaun disputa.

Maibé, Supremu Tribunal Australia la konkorda ho rekursu ne’e. Signifika katak julgamentu ba kazu ne’e sei kontinua la’o.

“Desizaun implika katak julgamentu sei kontinua realiza iha justisa australiana no la'os iha TL, hanesan Governu TL nia hakarak,” relata Lusa iha ninia públikasaun.

Tuir informasaun ne’ebé Tempotimor.com asesu husi Lusa, entre fulan Outubru no Novembru 2010, Lighthouse Corporation asina dokumentu tolu (3). Dokumentu hirak ne’e asina husi (eis) Primeiru Ministru Xanana Gusmão ho emprezariu Carlos Oliveira husi Zabra Fuels (TL), no Albert Jacobs husi Lighthouse (Australia).

Iha tinan 2010, Ligthouse aprezenta proposta ida ba Congénere Timorense, ba fornesimentu kombustível kuaze litru millaun 7 kada fulan, durante períodu ida, mínimu tinan 5.

Iha fulan hirak tuir mai, realiza fali negosiasaun no inklui karta intensaun ida, ne'ebé Governu TL hakarak efetua kompra inisial ida ho litru millaun 7,5 ba Zebra Fuel.

Maibé, ikus mai, governu TL deside atu la avansa ho proposta dahuluk, no asina fali kontratu ho empreza Timor seluk, ETO, ba fornesimentu entre loron 30 Agostu tinan 2010 no fulan Fevereiru tinan 2011.

Iha fulan Outubro 2010, Lighthouse aprezenta tan proposta foun ida no hahú husi ne’e, negosiasaun ba akordu fornesimentu kombustível avansa relativamente ho lalais.

Xanana Gusmão ne’ebé iha altura ne’ebá nu’udar PM, hakerek karta ida ba Lighthouse hodi informa katak, iha interese boot ida, iha proposta fornesimentu kombustível no jeradores.

Akordu mak selebra entre parte hotu, sustenta ba Lighthouse, sira haree antes entrega ba Governu letra kréditu ida, ne'ebé nunka to'o ka hetan onra husi ezekutivu timorense.

Iha inísiu 2011, jeradór rua ne'ebé enkomenda husi Lighthouse ba Cummins South Pacific, fornese ba TL, liu husi Lighthouse ne'ebé sira sei fatura ba Governu husi valor superior pursentu 200, relasiona ho valor inisial. Governu selu ona jerador hirak ne’e, diretamente ba Cummins South Pacific.

Rate this item
(3 votes)
Last modified on Wednesday, 11 December 2019 07:04
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items