"Joven Bernardo nia mãe ho nia alin mai hasoru ona ha'u iha semana ida ba kotuk, hato'o nia preokupasaun, hanesan Provedór ha'u hatete ba matebian nia inan katak, labele lakon esperansa kontinua luta atu ko'alia ho se de'it, Provedór sei hala'o nia serbisu sei komunika ho entidade sira ne'ebé kompetente, tanba Provedór nia rezultadu investigasaun tama tiha ona molok ha'u tomada de posse katak, destinasaun ne'ebé Provedór hala'o halo tiha e depois sira haruka ona ba entidade kompetente atu prosesa", dehan Provedór Direitu Umanu ba Justisa (PDHJ), Virgílio Guterres "Lamukan" iha Salaun Delta Nova, Sesta (27/01).
Provedór mós halo ona enkontru ho Komandante Jerál PNTL, Komisáriu Faustino da Costa hodi ko’alia kona-ba kazu joven ne’ebé mate iha sela.
"Depois ha'u mós halo ona enkontru ho Komisáriu Polísia e hato'o preokupasaun relasiona ho joven ne'ebé mak mate iha Delta detensaun no mós akontesimentu ne'ebé mosu iha sidade Dili no ha'u fo hatene katak, Provedór sei kontinua akompaña kazu ne'ebé joven mate iha sela detensaun", nia afirma.
Maske PDHJ la iha kompetensia atu identifika kona-ba se mak loos no sala iha kazu joven ne'ebé mate iha sela detensaun, maibé nu'udar defeza ba sidadaun ida nia direitu tenke tau prioridade.
Kazu deskonfia joven tara-aan iha sela detensaun laran, halo ona fulan lima, maibé seidauk iha rezultadu, tanba ne'e PDHJ husu ba família matebian atu kontinua pasiensia hein rezultadu ikus husi parte kompetente seluk.
"Importante labele lakon esperansa, tanba lia loos sei la mate", nia enkoraza.
Alende ne’e, PDHJ mós simu ona relatoriu kona-ba kazu ne’ebé membru FALINTIL-Forsa Defeza Timor-Leste (F-FDTL) baku joven iha Postu Administrativu Suai Loro, Munisípiu Kovalima.
"Kazu Suai loro ninian ne'ebé envolve F-FDTL, ekipa tun tiha ona no horseik loraik mak ha’u foin hetan rezultadu relatóriu no ha'u sei lee enjerál ami nota katak, iha abuzu de poder iha situasaun ne'ebá iha ne'ebé Forsa tenke halo agresaun fízika hasoru joven razaun, tanba de'it nia hatais farda arte Marsiais", nia informa.
Nune’e mós kona-ba kazu membru PNTL ne'ebé baku joven Cristiano iha Maliana Munisípiu Bobonaru, no PDHJ sei komunika ho parte kompetente hodi kontinua ba prosesu tuir mai.
"Iha kazu Maliana ninian parte fiskalizasaun no dirasaun teritoriál fo ona informasaun eh ami iha ona konkluzaun kona-ba kazu ne'ebé hasoru joven ida iha loron 27 fulan-Dezembru tinan 2022 eh ami komunika ona atu kontinua halo investigasaun iha tempu badak hodi haruka relatóriu ba entidade relevante", dehan nia.
Kazu PNTL baku joven Cristiano momentu tama kedas iha Hospital Nasional Guidu Valadares (HNGV), tanba vítima ho kondisaun grave. (*)