Ba kestaun ne’e, Prezidente Tribunal Rekursu (PTR), Deolindo dos Santos hatete, partidu polítiku lubuk ida sei labele hola parte iha eleisaun parlamentár tinan oin, tanba estatutu inválidu ona.
"Ha'u la lembra númeru fixu, mais atu dehan entre partidu sira ne’ebé iha ne'e, inisialmente iha 20-ital, mais agora dadauk iha partidu lubuk bo'ot ida ne'ebé perde estatutu partidu polítiku tiha ona, mesmu ke sira bele halo rekonsiliasaun, bele halo kampaña, mais tuir lei estatutu nu’udar partidu ne'e laiha tiha ona, ne’ebé sira labele tuir eleisaun," Prezidente TR ne’e dehan iha Parlamentu Nasionál, Kuarta (05/10).
Prezidente ba órgaun judisiál ne’e afirma, partidu hirak ne’ebé estatutu perde ne’e mak Asosiasaun Sosiál Demokrata Timorense (ASDT), PTP, Klibur Oan Timor As’wain (KOTA) inklui partidu polítiku balun tan.
"Sira ne'e, la'ós ha'u mak dehan, mais lei mak hatete, liu tinan lima sira la tuir eleisaun, entaun tuir lei sira-nia estatutu partidu polítiku mate ona, ne’ebé sira labele tuir eleisaun," Nia dehan.
Enkuantu, partidu polítiku foun haat ne'ebé antes ne'e tribunal rekursu rasik pronunsia indefinidu ne'e rua mak aprezenta an ona iha Tribunal. Nune’e, ida admitidu, no ida seluk tribunal seidauk pronunsia ninia difinitivu, maibe tribunal remese ona ba ministériu justisa atu kompleta kriteriu sira depois haruka fila ba tribunal hodi deside.
"Mais agora sira ne’ebé seidauk ba ne'e tribunal sei la pronunsia, mais ida seluk maka tribunal deside ona mak Os Verdes ne’ebé nia rejistadu legalmente nu’udar partidu polítiku ne'ebé bele konkore iha eleisaun," Deolindo hakotu.(*)