"Ha'u hanoin ko'alia kona-ba rai ne'e, hanesan señor deputadu ohin ko'alia ne'e los, he oras ne'e Ministériu Justisa halo hela esforsu para bele fó loloos ida ne'ebé mak na'in, ida ne'ebé mak la'os na'in, hahú halo hela identifikasaun sira-ne'e hotu," Ministru Asuntu Parlamentár no Komunikasaun Sosiál (MAPKomS) Francisco Martins da Costa Pereira Jerónimo, informa iha plenária PN, segunda (19/09).

Tanba, iha kazu barak ne'ebé akontese ba kotuk, maske tuir loloos nia la'ós na'in ba rai, maibé ikus mai nia hetan tiha títulu na'in ba rai.

Atu evita ida-ne'e, maka ministériu Justisa agora halo hela esforsu sira hodi identifika fila-fali kestun ida-ne'e, atu governu bele halo desizaun justu duni ho loloos.

Maibé, kona-ba preokusaun kazu rai Markoni nian, parte MAPKOMS sei atualiza hikas informasaun ne'ebe hato'o husi deputadu sira, ba Ministeriu Justisa atu haree.

Deputadu Bankada Kmanek Haburas Unidade Nasional Timor Oan (KHUNTO), António Verdial, hatete, nia parte dezafia kapasidade rekursu umanu husi Sekretáriu Estadu Terras e Propriedade (SETP) no presiza atu fo formasaun ba sira.

"Ita-nia rekursu umanu, ha'u bele deklara iha plenária ida-ne'e katak, rekursu umanu, Terras e Propriedade, Servisu Cadastrais seidauk sufisiénte, favór fó formasaun ba sira," nia hatete.

Tanba, kaer metin ba iha planu ne'ebé iha, Ministru Justisa, presiza kria kondisaun lai, tanba nu’udar deputadu hatene másimu ba asuntu hirak ne'e, katak prosesu identifikasaun no kondisaun la kria, agora atu hasai tán dekretu lei ida, la kleur tán atu fo sertfikadu ne'e kestionavel.

"Ha'u atu hatete, ha'u servisu iha área ida-ne'e tinan 30 resin hira efetivu, ita derepente ita fo sertifikadu ne'e, ha'u la hatene nia rekezitu atu halo nusa mak ne'e," nia kestiona. (*)