Lere fó ezemplu kona-ba kazu krime balun ne’ebé hetan pena todan liu maske rezultadu husi asaun ne’ebé halo kiik liu kompara ho kazu seluk ho modelu hanesan maibé rezulta impaktu ne’ebé boot liu no hetan pena kaman.

"Ha’u fó ezemplu hanesan kazu iha Lospalos ne'ebé ha’u-nia alin sira iha Asalaino ne'ebá tanbá sunu uma ida mai kadeia kuaze tinan 2, laiha julgamentu, maibé husi prizaun preventiva, be agora sira ida sunu uma 5 ka 6 ate halo kanek tan ema no oho tan ema ne'e Tribunal nia pozisaun oinsa? Tribunal atu husik de’it?, ha’u hanoin katak ne'e labele", deklara nia iha palasiu prezidensial Bairo-pite, Kuarta (06/11).

Lere hatutan, foin dadauk iha loron finadu liu ba akontese problema ne'ebé joven sira sunu uma, baku malu no oho malu iha Ermera, Kelikai, no Waibobo.

"Ha’u hein tribunal nia dezisaun, porque dala-barak tribunal fasilita em vez de fó kondisaun ida ne'ebé todan par abanbainrua labele repete tan maibé sira fasilita no hakmaan sira-nia sala, ne'e sira sai brani nafatin."

”Krime ne'e Tribunal mak tenke iha kompetensia atu toma medidas ba sira ne'ebé komete krime, se tribunal uza metodu ida ne'e ba sidadaun Timor-oan hotu hanoin katak Timor bele hakmatek,” dehan nia.