“La kleur tan, próximu semana, ami bele notifika sira-nia líder sira para hodi halo justifikasaun ba aktu violénsia sira-ne'ebé mosu desde iha fulan-agostu mai to'o iha dia 5 horseik”, dehan nia hafoin partisipa reuniaun urjente ho Vise Ministru Interior (MI), António Armindo, Sekretáriu Estadu Juventude no Desportu (SEJD) inklui Komandante Jerál PNTL, iha Edifísiu MI, kuarta (07/09).

Dadauk KRAM rasik fó sai ona sira-nia pozisaun ba públiku katak husu ba organizasaun Arte Marsiál sira ne'ebé hetan ona legalidade atu kontribui koolabora ho instituisaun Estadu sira hodi kria pás no hakmatek iha rai laran.

Tanba públiku hotu hatene akontesimentu ne’ebé mosu no kompeténsia ne'ebé KRAM sei halo fiskaliza no kontrola organizasaun sira-nia atividade no fó sansaun ba atividade ne'ebé konsidera envolve infrasaun sira hodi kontra lei númeru 5/2017 no diretiva sira-ne'ebé KRAM fó sai ona.

Maske Kazu ne'ebé mosu iha Akidiruhun loron 5 setembru 2022, konsidera hanesan Krime Públika maibé ida-ne'e responsabilidade kada individuál no Instituisaun Komandu PNTL mak iha kompeténsia atu halo investigasaun ba individu ida-ne'ebé komete problema liliu ba Violénsia sira-ne'ebé perturba orden públika sira.

Pozisaun KRAM nafatin haree liubá prosesu sira infraesaun nian ne'ebé komete husi Membru Organizasaun sira. Nune'e iha semana oin KRAM sei notifika kada líder husi organizasaun sira atu iha responsabilidade no mekanizmu justifikasaun sira ba KRAM.

“Ita hotu akompaña ne'e violénsia ne'ebé mosu iha Akadiruhun ne'e perturbasan orden Públika ne'ebé individu idaidak, sidadaun sira tuda malu iha ne'ebá, ohin ha'u hatete ona deskonfia envolve, iha prosesu investigasaun mak sei hatene katak se mak sai autór e se mak sai vítima”, esplika nia. (*)