Print this page

Komandu Jerál Nomeia Ekipa Internál Investiga Kazu  Joven Tara-an iha Sala Detensaun

By September 02, 2022 1356
Portavoz Polísia Nasionál Timor-Leste (PNTL), Superintendente Xefe Armando Monteiro. Portavoz Polísia Nasionál Timor-Leste (PNTL), Superintendente Xefe Armando Monteiro. Foto Suplay

Tempotimor (Dili)-Komandante Jeral Polísia Nasionál Timor-Leste (PNTL), Komisáriu Faustino da Costa sei nomeia ekipa internál Instituisaun PNTL atu investiga kazu joven ne'ebé mate ho kondisaun tara-an iha sela deteinsaun komandu PNTL Munisípiu Dili.

“Oras tan sua eselénsia Komandante Jerál PNTL sei hasai orden urjénsia ida no nomeia ekipa investigasaun internál ida PNTL ninian, relasiona ho akontesimentu kazu ne'ebé mak ita hotu la espera akontese iha sela deteinsaun komandu PNTL Munisípiu Dili”, dehan Portavoz Polísia Nasionál Timor-Leste (PNTL), Superintendente Xefe Armando Monteiro iha Komandu Jerál PNTL, Kaikoli, sesta (02/09).

Tanba hanesan públiku tomak akompaña akontesimentu kazu sensivu iha komandu PNTL Munisípiu Dili kinta (01/09) kalan ne'ebé mak Joven ida hakotu is iha sala deteinsaun ho kondisaun tara-an.

Hafoin akontesimentu ida-ne'e mós parte komandu PNTL Munisípiu Dili konvoka kedas reuniaun alargada ho parte PDHJ, Defensór Públika, no Ministériu Públiku, nomós reprezentante husi Família inklui parte husi vítima nia organizasaun ne'ebé mak nia hamahon-an.

Aleinde iha loron sesta (02/09) komandu Jerál PNTL mós realiza enkontru ida iha sala reuniaun Komandu Jerál PNTL nian no rezultadu husi reuniaun ida-ne'e sei iha informasaun ne'ebé relavante no presiza investigasaun finalidade hafoin ida-ne'e mak bele anúnsia ho publikamente.

Pozisaun PNTL hakarak hato'o informasaun importante ida-ne'e ba sidadaun hotu no mídia atu informasaun sira ne'ebé mak sai tenke sai husi funsaun sira ne'ebé iha kompeténsia.

Tanba hasai informasaun ne'ebe bele ho ninia responsabilidade no akontabilidade ho transparnte hodi evita run moris no boatu ne'ebé kria husi ema inresponsabilidade atu perturba no kria instabilidade ba país ida-ne'e.

Antes ne’e, Família Matebian liliu Inan, Rejina Soares hakarak  entrega matebian José Bernardo ba Polísia Sientífiku Investigasaun Kriminál (PSIK) hodi halo Autopsia atu hatene kona-ba motivu matebian tara-an iha Sela Detensaun Polísia Nasionál Timor-Leste (PNTL) iha Komandu Munisípiu Díli.

“Ha'u husu, PSIK mak kaer de'it iha Autopsia ne'e, ha'u husu ba PSIK de'it mak halo investigasaun ba ha'u-nia oan labele fó ba sese mak ha'u hakarak PSIK”, dehan nia ba jornalista sira iha Hospital Nasionál Guidu Valadares, kinta (01/09).

Nune'e inan matebian José ne'e husu ba Komandu Polísia sira atu tau tau membru hodi hein Sela Detensaun ne'e labele halimar de'it mak telefone maibé halo servisu ho Profesionál.

“Husu ba boot sira hotu mate mak ha'u nia oan ona, iha Sell nia laran ne'e, tara an ka oho ka ne'e ha'u la hatene, halo favór boot ba Polísia boot sira atu tau ema ne'ebé mak haree sel tau ema ne'ebé tau ema ne'ebé mak hatene kakutak joga keta tau kakutak tik tok iha laran no tau telefone mak iha laran”, afirma nia.

Iha kalan kinta (01/09) derepente de'it matebian tara-an ho fiu internet ne'ebé mak liga iha sela detensaun iha oras tuku 8:00

Tuir kronolojia katak, José Bernardo halo konflitu besik estadiu Munisípiu Dili, tanba ne'e mak PNTL detein iha sela durante oras 12 nian laran, ikus mais José hakotu nia vida liuhusi tara-an.

Tuir Informasaun ne'ebé www.tempotimor.com rekolla iha terenu katak, antes ne'e matebian ne'e baku malu sidadaun ida to'o Baixa iha Hospital Nasional Guidu Valadares (HNGV) tanba sofre kanek todan.

Hafoin nia baku tiha sidadaun Baixa iha HNGV Polísia Nasionál Timor Leste liuhusi Komandu Dili kaptura kedas iha Sela Detensaun Kaikoli durante oras 12.

Maibé realidade iha matebian hakotu nia peregrinasaun liuhusi tara-an iha Sela Detensaun Kaikoli. (*)

 

Rate this item
(1 Vote)
Last modified on Friday, 02 September 2022 16:05
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items