Tuir Prokuradór Jeral Republika José da Costa Ximenes politiku sira iha Parlamentu Nasionál (PN) fase liman bainhira mosu problema kona-ba karreta prado ne’ebé eis deputadu sira seidauk entrega.
"Kona-ba karreta nian politiku sira ne'e kuandu iha problema ruma sira fase tiha liman fó ema seluk mak rezolve, ami mak rezolve," dehan PJR hafoin enkontru mensal ho Prezidente Republika Francisco Guterres iha Palasiu Prezidensial Bairopite, Tersa (05/11/19).
Tuir nia, loloos problema prado ne’e kompetensia lider bankada sira atu rezolve, maibé ida ne’e la konsege halo tanba laiha kapasidade.
"Simu tiha ona devia lider bankada sira mak deside dada fila fali, acaba, mas como laiha kapasidade par halo ida ne’e haruka mai ami no agora prosesu la’o hela," dehan nia.
José dehan, PJR simu karta husi Sekretariu Jeral PN kona-ba karreta prado ne’ebé eis deputadu sira lori ba uma hodi haree iha prosesu krime ka kontensiozu.
“Daudauk ne’e ami-nia ekipa haree hela,” dehan nia.