Portavóz Invetigadór PSIK, Octávio da Costa Araújo hatete, kazu droga ne’ebé komete husi arguidu na’in-9, tribunál aplika Termu Identidade Rezidénsia (TIR) no Aprezentasaun Periodika (AP), ne’e servisu PSIK remata ona kompeténsia tomak entrega ba Ministériu ho Tribunál halo bele hola desizaun nu’udar na’in ba asaun penal.

“Ida-ne’e ha’u labele kometa, tanba dadaun ne’e Ministériu Públiku halo hela rekursu ba tribunál kona-ba arguidu na’in-9 ne’ebé komete kazu ilisitu ba droga, tanba ami servisu termina provizóriu ka pauza provizóriu”, dehan Octávio, iha kna’ar fatin, KaiKoli, (1/09).

Bainhira PSIK produz ona auto-notísia haruka ona ba Prokuradór Jerál Repúblika (PJR), aprezenta ona ba tribunál hodi tuir interrogatóriu dahuluk halo ona julgamentu PSIK laiha ona kompeténsia atu ko’alia.

Tanba arguidu na’in-9 ne’ebé komete kazu ilisitu droga tuir ona interogatóriu dahuluk no desizaun tribunál hasai ona no Ministériu Públiku dadaun ne’e sei halo hela rekursu hasoru desizaun husi Tribunál, tanba ne’e autoridade PSIK seidauk bele fó hanoin ruma kona-ba kazu droga.

“Maibé rezultadu agora ita hotu hatene Tribunál aplika Termu Identidade Rezidénsia (TIR) ho Aprezentasaun Periodika (AP) no Ministériu Públiku sei halo hela rekursu ba kazu ne’e ami labele fó komentáriu, tanba ne’e ami hanesan ezekutadór prontu simu orde, bainhira iha ona delegasaun foun mai ami  prontu atu halo invetigasaun klean tan ba kazu ne’e tuir rekomedasaun ne’e mak ita Tribunál husu ba Ministériu Públiku hato’o ba ami”, deklara nia.

Tanba ne’e, arguidu ba kazu ilisitu droga kompleta ona loron 15, maibé parte autoridade Invetigadór PSIK seidauk simu fali karta notifikasaun foun hodi investiga klean ba kazu droga ne’ebé sidadaun timoroan na’in-9 komete.

“To’o agora kompleta ona loron 15, maibé desizaun Tribunál ba rekursu ne’ebé mak Prokuradór Jerál Repúblika submete hikas ba kazu seidauk iha ami labele fó kometáriu ruma laiha baze legál ruma iha ami-nia liman”, esplika Nia.

Antes ne’e, Ministériu Públiku (MP) hatama ona pedidu rekursu hodi kontra desizaun Tribunál Distritál Dili (TDD) kona-ba kazu droga ne’ebé aplika Termu Identidade Rezidénsia (TIR), ho aprezentasaun Periodika ba Arguidu na’in-9.

Enkuatu arguidu na’in-9 ne’ebé komete kazu ilisitu droga ekipa konjunta autoridade seguransa Timor-Leste halo kapturasaun ba sira durante loron rua hahú 11 to’o 12 fulan-agostu kaptura arguidu na’in-sia ho insiál DGS, MM, B, MAA, AY, SSO, M, CRMS no J iha fatin ne’ebé la hanesan no halo apreensaun ba evidénsia droga sira iha área juridika Munisípiu Dili. (*)