Ekipa konjunta halo detensaun, apreensaun no buska domisiliariu ba suspeitu inisiál FA iha nia rezidénsia Metiaut bazea ba mandadu husi tribunál.
Detensaun, apreensaun no buska domisiliariu ne’ebé maka ekipa konjuntu halo ba suspeitu FA nia rezidénsia Metiaut la’o durante oras tolu nia laran, hahú husi 11: 00h dader to’o 14:00h.
Enkuantu iha prosesu detensaun, apreensaun no buska domisiliáriu ba suspeitu nia rezidénsia Metiaut Suspeitu FA koopera ho parte PSIK hodi autoriza ekipa halo buska ba sasán sira iha kontetór laran ne’ebé suspeitu rasik importa husi rai li’ur.
Alende ne’e, ekipa konjunta ne’ebé lideradu husi PSIK kontinua halo buska no apreensaun ba suspeitu FA nia uma iha área Taibesi, hodi kontinua halo buska no halo aprensaun hodi rekolla evidénsia balun tan.
Ho suspeitu nia hahalok viola artigu 7 husi lei númeiru 2/2017 kosumu ilísitu droga.
Entretantu tuir observasaun www.tempotimor.com iha terenu nota ekipa konjuta lori kedan suspeitu FA hodi detein iha sela PSIK Kaikoli nune’e kumpri oras 72 molok submete ba Interogatóriu dahuluk iha Tribunál Distritál Dili (TDD).
Durante ekipa konjunta halo detensaun, apreensaun no buska iha prosesu suspeitu nia rezidénsia hetan akompañamentu husi suspeitu nian Defensór Estaqui Guterres.
Hafoin ekipa konjunta halo detensaun, apreensaun no buska iha prosesu suspeitu nia rezidénsia, suspeitu nian Defezór Privadu Estaqui Guterres, hatete, nia prezensa iha nia kliénte nia rezidénsia ne’e tanba hetan kontaktu husi nia kliénte.
“Ha’u mai iha akompaña ha’u-nia kilénta iha prosesu buska ne’e tanba hetan telefone husi nian kliénte rasik. Tanba nia, ha’u-nia kliénte entaun ha’u mai”, dehan Defezór Estaqui Guterres, bainhira akompañia nia kliénte FA iha nia rezidénsia Metiaut, kinta (01/09)
Tanba Estatutu Defensoria Públika fó dalan, Defesór públiku halo akompañamentu ba nia kliénta bainhira polísia halo apreensaun no buska.
“Defensór públiku, kualker iha tempu ne’ebé de’it, kuandu presiza atu halo akompañamentu ba kliénte, ne’e estatu fó dalan atu halo akompañamentu no fó prosesu legál, kualker iha momentu saida de’it. Kualker ema ida ne’ebé mak presiza Defensór bele fó garantia ba nia kliénte, la taka dalan ema ne’ebé mak sente sai hanesan vítima, ou sente prejudika, kualker kontaktu Defesór tenke ba’, esplika nia.
Tanba ne’e, Defensória Públika ne’e la siknifika atu kaer de’it defende ema kbi’it la’ek, maibé mós fó asisténsia ba sidadaun hotu ne’ebé presiza.
“Kualker sé de’it, mak presiza hanesan Defensória Públika nia tenke marka iha nia prenzesa, nia marka prezensa iha kualker oras”, dehan nia. (*)