PJR dehan, PR Lu Olo nu’udar Xefe Estadu rona informasaun husi elementu estadu tomak hafoin nia uza ninia kompetensia hodi deside.
"Agora ha’u-nia kompetensia ne'e saida?, hakarak envolve PJR ne'e salah alamat", dehan José iha Palasiu Prezidensial Bairopite, Tersa (05/11/19).
Nia afirma, durante ne’e PR simu informasaun husi orgaun hotu-hotu no PJR fó informasaun mensal de’it.
“Informasaun semanal sira ne'e halo ho Parlamentu Nasional, Primeiru Ministru, Komandante Jeral PNTL no F-FDTL, inklui aturidade hotu-hotu,” dehan nia.
PJR ne’e hatutan, iha ema barak mak fó informasaun ba PR ho nune'e laiha razaun atu hatete katak PJR mak envolve iha dezisaun PR hodi la fó pose ba membru governu na’in sia.
"Ha’u-nia majestradu ida mak la toma posse ne'e bele husu mai ha’u, maibé politiku ida mak la fó posse husu mai ha’u ne'e, ha’u laos ema politiku," dehan nia.