“Tanba kazu krime tranzasionál hanesan droga atual ne'ebé tribunál foti desizaun fó TIR, FMTL deskonfia autoridade judisiál sira mós sei menus koiñesimentu e sira envolve direta iha kazu máfia justisa sira hanesan droga tanba afeta prosesu tomak ba desizaun tribunál”, dehan Portavoz FMTL, Noe Ximenes liuhusi komunikadu imprensa iha Kampus Sentral UNTL, kuarta (17/08).
Maske Tribunál Distritál Díli rasik liuhusi juis singular, José Gonçalves, segunda (15/08), deside aplika medida koasaun Termu Identidade Rezidénsia (TIR) no Aprezentasaun Periódika ba arguidu sira hanesan DGS, MM, B, MAA, AY, SSO, M, CRM ho J tanba laiha faktu ne'ebé forte.
Ba desizaun TIR ne'ebé aplika husi Tribunál, mak FMTL husu ba Ministériu Públiku atu halo rekursu hasoru Tribunál.
Tanba kazu droga ne'ebé desizaun fó de’it medida kuasaun TIR, fiar ka la fiar, autór ka trafikante droga sira seluseluk sei la tauk justisa iha Timor-Leste.
Tanba ne'e, atu konduz kriminalidade sira-ne'e FMTL dezafia ba líder sira tenke iha obrigasaun morál hodi aponta iha ajenda polítika Públika hodi bele minimiza kriminaliza kriminalidade atu nune'e afirma Solidaridade no valór umana, atu labele defende Grupu sira.
Konsikuensia husi konsumu droga ida-ne'e, maske vulnerável sira feto no labarik, ferik katuas sira, alezadu sira la kontra forma sira ho violénsia nian, esplorasan deskriminasaun abandonadu hanehan ka obriga abuzu seksuál halo at sira-ne'ebé povu ki'ikoan sira durante ne'e enfrenta.
Tanba ne'e FMTL deklara kazu kona-ba krime organizadu sira liliu hanesan droga ne'e zero toleránsia, karik ba líder sira mak sente ida-ne'e iha benifisiu ba sira, maibé ba Povu lae.
“Tanba ida-ne'e sei afeta ita-nia sosiedade tomak atu desorganizadu, kriminalizadu nomós desorientadu iha futuru. Moralmente kuandu ita konsumu droga, ne'e automatikamente ita sei haluha ita-nia an hanesan sosiedade no hanesan sidadaun ida”, hatete nia.
Ba kazu ida-ne'e, hatudu ona esperiénsia iha nasaun barak, no iha referénsia lubuk ida mak Timor-Leste anota katak indisiplinadu, desrespeitu, desmoraliza, situasaun sira-ne'e sei akontese kuandu sidadaun ida ka individu ida konsumu droga.
“Tanba ida-ne'e mak ita la fó fatin ba kualker se de'it, tantu líder nia oan, atu deputadu, ka Primeiru Ministru, atu Ministru ka Sekretáriu Estadu, atu Prezidente Repúblika, atu Prezidente Tribunál Rekursu ou atu Tribunál Distrital ninia oan sira karik ita la tolera situasaun sira ne’e akontese iha ita-nia rai”, deklara nia. (*)
