Komandante PNTL Munsípiu Dili, Superintendente Xefe Henrique da Costa hatete, konfrontu estudante husi Eskola Sekundária Jerál 12 de Novemberu ho Eskola Sekundária Jeral 5 de Maiu tuda malu, maibé estudante husi eskola 12 Novemberu mak tuda hasoru PNTL hodi rezulta membru ida kanek no karreta ida vidru rahun.
“Estudante ida ho inisiál PL, tuda hasoru kedas Xefe Operasaun ho membru Kristu Rei nia ne'ebé mak atua konfrontu entre eskola rua ne'e, hodi rezulta Xefe Operasaun nia ain tuur kanek, e karreta patrolla Kristu Rei ninia, vidru boot oin ne'e rahun no espellu sira mós rahun hotu”, dehan Henrique iha kna’ar fatin Kaikoli, sesta (05/08).
Nune'e prosesu hirak ne'e husi parte investigasaun rejistu ho númeru NUC, 0132/2022 DIBSR ho tipu krime artigu 2043 obsesaun ba autóridade artigu 2059 danu agravadu.
“Dadaun ne'e suspeitu sira seluk, hamutuk ho suspeitu prinsipál ne'e iha hela sela detensaun ninia, e ita mós informa ona ba sira-nia família, lori sira-nia sertidaun sira mai para ita haree, se sira idade menus husi 16 ita sei liberta, se sira 16 ba leten ita sei aprezenta hotu ba Ministériu Públiku”, afirma nia.
Suspeitu husi essola rua ne'ebé PNTL detein ne'e hamutuk 31, maibé to’o halo identifikasaun autór prinsipál hamutuk na’in-21 no sira seluk PNTL liberta tanba la envolve.
Motiva husi kazu katak sira hirak ne'e baibain ona husi essola rua ne'e sempre la kontente ba malu, dalaruma sira iha li'ur ne'e envolve iha atividade balun, no sira lori tama to’o eskola, maibé parte investigasaun sei kontinua hela hodi hatene motivu lolos husi kazu ne'e.
Entretantu situasaun iha eskola la'o normál no komandu nafatin garante prosesu aprendisajen la'o di’ak, tanba eskola fatin atu aprende la'ós fatin atu halo krime. (*)