“Tuir lei ida-ne’e iha artigu 9 PNTL nia área servisu ne’e limitadu depois ba PSIK ninian iha artigu 10 ne'e kuaze servisu sira ne’ebé mak PNTL halo ne'e fó tomak PSIK ida mak violasaun sexuál ne'e ba PSIK, ha’u hanoin ida-ne’e kazu violasaun sexuál ne’e ita-nia PNTL sira maka atende nanis ba kazu ida-ne’e liliu ba polísia Vulneravel sira”, dehan nia liuhusi Konferensia Imprensa iha Edifísiu FM iha Bairu Sentrál, segunda (25/07).

Durante ne’e, Polísia Nasionál Timor-Leste mak halo parseiru ho Sosiedade Sivíl sira maibé ho kriasaun lei ne’e Fundasaun Mahein konsidera harahun fali kooperasaun ne’ebé mak instituisaun rua hanesan sosiedade sivil ho PNTL hala’o tiha ona iha tinan barak.

Tanba ne’e, rekomeda atu haree filafali lei hirak ne’e tanba fó implikasaun boot ba funsionamentu insitituisaun Polísia Nasionál iha Timor-Leste no judisiál iha Timor-Leste.

“Lei ne’e kuaze Copy Paste husi Portugál no aprova lalais iha Parlamentu Nasionál sein halo konsultasaun ka diskusaun kle’an entre insitituisaun xave sira inklui PNTL sosiedade sivíl parseiru internasionál akademista ka membru ne’ebé tau matan ba assuntu seguransa sira tanba ne’e mak FM haree presiza diskusaun ne’ebé nakloke no kle’an kona-ba lei ne'e atu nune’e lei ne’e adapta ba kondisaun sira iha Timor-Leste”, afirma nia.

Rekomendasaun seluk mak husu ba Asesór Internasionál sira atu labele Copy Paste lei sira iha Portugál hodi mai aplika iha Timor-Leste, maibé hamosu lei ne’ebé relevante ho situasaun Timor-Leste.

“Liuliu iha área direitu ka lei bainhira risku boot bainhira adopta lei modelu insitituisaun husi rai li'ur sein halo adapatasaun ba kontestu Timor-Leste nune’e FM husu presiza hamenus dependénsia ba Asesór Internasionál sira”, dehan nia.

Nune’e husu ba kriadór lei refere katak presiza lei ne’e halo tradúz ba lian-tetum atu nune’e komunidade sira ne’ebé hatene hodi komprende lei Organizasaun Investigasaun Kriminál nian. (*)