Portavoz Komandu Jerál Polísia Nasionál Timor Leste (PNTL), Superintende Xefe Armando Monteiro hatete, kazu Ofensa Integridade Fíziku Simples (OIFS) suspeitu sira sei ba primeiru interogatóriu iha Tribunál Distritál Baukau.

“Kazu seluk ne’ebé akontese iha Munisípiu Vikeké hanesan kazu, asaltu nomós Ofensa Integridade Fíziku Simples ne’ebé mak ita-nia sidadaun na’in-rua sai vítima atusaun PNTL kaptura ona na’in-neen ne’ebé agora dadaun submete hela prosesu investigasaun iha komandante PNTL Munisípiu Vikeké, Postu Uatulari no tuir ajenda aban sei prosesa primeira interogatóriu iha Munisípiu Baukau”, dehan Superintende Xefe Armando Monteiro liuhusi Konferensia Imprensa iha Komando Jerál PNTL Kaikoli, kinta (14/07).

Akontesimentu ne'e rezulta na’in-rua sai vítima no PNTL halo atausaun kaptura ema na'in-neen (6) iha kazu OIFS refere.

“Kazu Uatulari ne’e mós tanba (mis-comunication) iha eventu kulturál ida, tanba nia la kontrola-an tanba hemu tua no domina ho alku to'o ikus hamosu konflitu no rezulta na’in-rua sai vítima”, esplika nia.

Ba operasaun PNTL kontinua apoiu husi Unidade Espesiál Polísia (UEP) akompaña ho operasaun espesiál no hamutuk ho Task Force normaliza situasaun, hodi nune’e komunidade hala'o nia atividade hanesan baibain.

Entre tantu kona-ba kazu OIFS iha Bekussi Kraik nomós kazu asaltu nomós iha Bidau Santana iha ona prosesa Investigasaun iha Komandu Polísia.

“Situasaun jeralmente seguransa iha rai laran PNTL rejista kazu balun  mak sai preokupasaun ba ita hotu mak, kazu Ofensa Integridade Fíziku no Simples (OIFS), nomós asaltu iha Kapitál Dili ne’ebé mak akontese liu loron tolu liu ba iha Bekussi Kraik tantu mós kazu asaltu nomós  arma brankas iha Bidau Santana iha kapitál Dili, husi akontesimentu ne’e ita-nia Komandu PNTL Munisípiu Dili hola ona medida polisiál no suspeitu submete ona prosedimentu investigasaun”, informa nia. (*)