Ministru ne’e hatete, nia prontu no sei ba hatan bainhira PN bolu nia.

"Ha'u hein hela Parlamentu ka Komisaun bolu mak ministru ba hatan iha ne'ebá," dehan Ministru Carceres ba jornalista sira iha Palasiu Governu, Kuarta (23/10/2019).

Ministru ne’e dehan, nia sei la fó resposta kona-ba kazu hirak ne’ebé alega ba nia ba jornalista sira tanba lakohi sai “ministru malkriadu”.

"Deputadu kestiona iha plenária, ministériu ninia étika dehan deputadu ko'alia iha plenária, ministru responde ba plenária. Ministru labele responde deputadu nia deklarasaun husi jornalista, ne'e iha sinais kuotasaun katak "Ministru Malkriadu", dehan Ministru Cárceres.

Ministru ne’e dehan, se deputadu hato’o deklarasaun ba media, nia mós sei hatan liu husi media, maibé tanba deputadu kestiona iha plenaria nune’e nia mós sei hatan iha plenaria.

"Se señor deputadu balun mak dehan ba jornal ruma karik, ministru mós bele responde ba jornal, maibé señor deputadu no señora deputada sira iha plenária, ministru labele responde distintu deputadu no deputada nia deklarasaun ne'e liu husi jornal," deklara nia.

Molok ne’e, deputadu husi Bankada CNRT, José Virglio duun Ministru Justisa Manuel Carceres hada’u komunidade ida nia rai iha area Bekora, Dili, hodi fó aluga ba kompaña balun.

Deputadu CNRT ne’e dehan, iha tinan 2019, Ministru Carceres hasai despaisu ida hodi fó arendamentu rai refere ba kompaña ida.

"Señor Ministru Justisa (MJ) Manuel Cárceres da Costa ne'ebé fó sai nia despaxu iha 2019 fó ba kompañia Nag**** halo arendamentu ba rai ida iha Bekora ne'ebá, ita-nia populasaun iha ne'ebá no rai na'in preokupa ba despaxu MJ nian ne'ebé foti rai privadu hodi halo arendamentu ba kompañia," dehan Deputadu CNRT ne’e iha plenária Parlamentu Nasional (PN), Segunda (21/10/2019).

Tuir deputadu ne’e, rai ne’ebé MJ Carceres hada’u ne’e rai privadu husi komunidade ida ho naran Stive.

"Ministru MJ nia despaxu ne'ebé hatùn ba kompañia ne'e dehan fó arendamentu ba kompañia Nag****, maibé rai ne'e señor Stive nian, ne'ebé ema ne'e uluk hela iha ne'ebá no hola rai ne'e iha tempu Indonézia nian. Tanba saida mak MJ halo despaxu hodi foti rai ne'e no arenda ba kompañia Nag****," deputadu ne’e kestiona.

Tuir informasaun ne’ebé deputadu ne’e simu, MJ Carceres lori autoridade seguransa hodi ameasa no baku ema ne’ebé sai nu’udar nain ba rai no nia feton.

"Señor ne'e hatete katak señor MJ lori polisia hodi ba halo ameasa iha ne'ebá, baku nia no nia alin feto, ne'ebé sira lamenta tebes ho ida ne'e," informa Deputadu CNRT ne'e.