Diretór Jerál, Servisu Migrasaun, Superintendente Asistente Luis Soares Barreto esplika, Ba sidadadaun estranjeiru na’in-2 ne'e husi Fujian-Xina, mane ida ho naran inisiál WX tinan 33, no feto ida naran HSJ tinan 33.

Servisu Migrasaun kaptura sidadaun na’in-rua ne’e tanba servisu loke rasik ajensia ida no durante ne’e halo ona falsifikasaun ba dokumentu ofisiál nasaun nian ho sira-nia karimbu rasik hodi halo vistu servisu no pareser legál nian.

Iha momentu ne'ebá kedas, sidadaun na’in-rua ne’e rekuñese sira-nia aktu no parte migrasaun lori ba Sede Sentral Migrasaun hodi foti identidade no entrega ba Komandu Munisípiu Dili hodi halo detensaun.

Tanba ne’e sidadaun na’in-rua ne’e detein ona iha sala detensaun Komandu Munisípiu Dili, no kumpri ona 72 horas, nune'e loron sesta ba Tribunál Distrital Dili hodi tuir Primeiru Interogatáriu no nune'e hein desizaun finál husi tribunál.

“Sira detein 72 oras ona, no ohin loron lori ona ba tribunál liuhusi Ministériu Públiku hodi halo Primeiru Interogatáriu no Ministériu Públiku mak sei halo akuzasaun no ohin lokraik tama ona ba tribunál no hein de’it desizasaun husi tribunál”, dehan Diretór Jerál, Servisu Migrasaun, Superintendente Asistente Luis Soares Barreto, iha nia servisu fatin, Ministeriu Interior, Vilaverde, sesta ( 08/07).

Bainhira kaptura sidadaun estranjeiru na’in-rua ne’e, iha mós evidénsia ne’ebé rekolla hanesan karimbu 113, kompostu husi karimbu kompaña 86, karimbu diretór 21, karimbu Ospitál Nasionál Guido Valadares 1, no restante husi sira-nia ajensia.

“Ita rekolla mós evidénsia hirak ne'ebé iha no dokumentu balu, hanesan passaporte, no komputadór desktop hamutuk 5, laptop 1 no komandante operasaun ho nia membru sira lori ona evidénsia sira ne'e ba Ministériu Públiku. Ami hein de’it Prokuradór sira atu haree kazu ne'e ou fó kompeténsia ba se mak atu haree kazu ne'e no depois lori ba Tribunál no Tribunál sei deside bazeia ba lei ne'ebé mak iha”, informa nia.

Entertantu, Komandante Munisipiu Dili, Superintendente Xefe Henrique da Costa hatete, sidadaun na'in-rua ne’e detein ona iha sala detensaun Komandu Munisipiu Dili, tanba Servisu Migrasaun laiha sala detensaun.

“Parte Migrasaun konklui ona investigasaun maibe tanba sira laiha sala detensaun entaun sidadaun nain rua ne’e ita detein provizoriu iha ne’e durante oras 72 nia laran, hafoin sei kontinua ba Ministeriu Publiku hodi hare ba parte juridiku nian no halo investigasaun tuir prosesu legal nian”, dehan Komandante PNTL Dili, Henrique da Costa. (*)