Tuir informasaun ne’ebé www.tempotimor.com asesu iha pájina Ministériu Justisa, kinta (07/07) katak, asina tura akordu ne’ebé hala’o iha loron tersa (05/07), Ministru Justisa Tiago Amaral Sarmento, partisipa iha seremónia asinatura ba adenda ba akordu entre delegasaun União Europeia ho Kooperasaun Portuguéz, asina direta husi Embaisadór União Europeia, Andrew Jacobs ho Embaisadora Portugal iha Timor-Leste, Manuela Bairos.
Iha asinatura prolongasaun programa projetu Public Financial Management and Oversinght (PFMO) ba segundu periodu refere ho durasaun, adisionál tempu fulan 18, hahú husi 05 Jullu ate 31 Agostu 2023.
Programa Public Financial Management and Oversinght (PFMO) nia objetivu atu reforsa kapasidade ba kontrolu Finansas Públiku iha Instituisaun Estatal no la estatal, Parlamentu Nasionál, Inspesaun-Jerál Estadu, Camara de Contas, Komisaun Anti Korrupsaun, PSIK, Prokuradoria-Jerál Repúbliku, Komunikasuan Sosiál no organizasaun sira husi Sosiedade Sivíl nian.
Iha faze daruak husi eventu ne’e mak “formalizasaun entrega Servidór Seguru ba Polísia Sientifika no Investigasaun Kriminál.” Entrega Servidór Seguru husi Uniaun Europa no Kooperasaun Portuguéz atraves projetu PFMO komponente 2 ho naran " Osan Povu nian, Jere ho Di’ak”, ba Polísia Sientifika no Investigasaun Kriminal, (PSIK) Ministériu Justisa.
Ekipamentu ho kapasidade tékniku elevadu hodi aumenta kualitativu iha dezenvolvimentu programa siber seguransa no kombate ba siber-krime no liliu diresionadu ba sira-nia nesesidade operasional sira. Ekipamentus ho todan 230 Kg refere, asegura ona iha edifisiu PCIC, Ministériu Justisa iha, fulan Marsu 2022 liuba.
Iha prolongasaun programa PFMO refere sei iha mós formasaun ba espesialista husi laboratóriu PSIK nian ne’ebé sei realiza iha tinan ne’e, iha Portugal.
Seremónia asinatura akordu no formalizasaun entrega ekipamentu seguru refere partisipa mós husi Diretor Nasionál PSIK, Vicente F. e Brites, Prokuradór Pascasio Alves no parte Tribunál das Contas nian, Juiza Konseleira Jacinta Correia da Costa, Inspetór Jerál Estadu no konvidadu sira. (*)
