“Hakarak hato'o lamentasaun ba deputadu sira, ba bankada A to'o Z, maibé liliu ba bankada FRETILIN, ne'ebé halo lamentasaun katak, ami ba palásiu Prezidente Repúblika, ami ba halo foer no hatun dignidade nasaun ninian”, dehan Portavoz Aileba iha Jardin 5 de Maiu, Kolmera, sesta (01/07).
Tanba durante tinan 20 nia laran ukun-an maske Prezidente Repúblika troka Mlau, maibé seidauk iha ida mak autoriza ai-leba tama iha Palásiu Prezidensiál hanesan akontese dadaun no hetan kritima maka’as husi deputadu sira.
“Prezidente hira mak troka maluk ona, maibé foin mak prezidente ida ne'e, halo programa ida-ne'e, ba fa’an ai-fuan iha palásiu prezidensiál, ami sente kontente hanesan nasaun ne'e ami-nian, tanba ami bele tama palásiu”, deklara nia.
Ho ai-leba ne’ebé mosu iha Palásiu Prezidensiál hodi hetan apoiu ba nesesidade bázika diáriu, tanba Governu la tau responsabilidade ba ai-leba nia moris durante ne’e.
“To'o mai ohin mak ami halo fo’er, desde uluk kedas, 2014 to'o 2015, ami vendedór ambulante ba ona Parlamentu Nasionál, deputadu lubun ida koñese ami”, afirma nia.
Ba deputadu sira bankada Fretilin lori ai-leba mak ba tur iha Parlamentu Nasionál no ikus mai deklara ai-leba halo foer sidade Dili, inklui sira mak halo engrapamentu no taka dalan.
“Ami lori ai-leba atu hadi'a ami-nia moris, ami nunka tane liman ba membru Parlamentu no Governu ne'e la’e, husi ami-nia ai-leba ne'e atu transforma sai fali osan atu sustenta família”, hatete nia. (*)