Tuir informasaun ne’ebé www.tempotimor.com asesu iha pájina Ministériu Justisa, sesta (01/07) katak, iha loron kinta (30/06) loraik, maizomenus tuku 6 Otl, bainhira Diretór Estabelesimentu Prizionál Suai informa ba Ministru Justisa katak inundasaun iha Estabelesimentu Prizional Suai tama to'o laran no afeta ba Prezu sira.

Tanba ne’’e, Ministru Justisa (MJ), Tiago Amaral Sarmento, Komunika kedas ho PNTL, Bombeiros, Guarda Prizioneiriu, no autoridade lokál momós ba Adjunta Prokuradór Jerál Repúblika, no Prokuradór Suai, Komandu Jerál PNTL, Vise-Ministru Interior, Ministru Obras Públika, Sekretáriu Estadu Protesaun Sivíl, Ministru Transporte no Komunikasaun no Administradór Munisípiu Suai atu fó apoiu ba situasaun emerjénsia refere.

Nune'e iha oras mais menus tuku 8:00 ekipa konjunta hahú evakua Prezu ka dadur sira hamutuk ema na’in-125 pessoss ba iha fatin seguru hanesan salaun Airoportu Suai, to'o oras 24.00 ekipa konjunta konsege evakua hotu prezu sira ba fatin refere no hamamuk Estabelesimentu Prizional Suai.

Dadaun ne’e Prezu sira husi Estabelesimentu Prizionál Suai kontinua iha Aeroportu Kay Rala Xanana Gusmão, Suai, hodi akompaña situasaun udan iha Covalima.

Guarda prizional no ekipa konjunta sei reintegra hikas Prezu sira ba Estblesimentu Prizional Suai laran, wainhira laiha ona udan no bee iha Estabelesimentu Prizional laran menus no hein orientasaun husi Ministru Justisa.

Tanba ne’e ekipa sira iha Covalima kontinua halo reuniaun koordenasaun ho Administradór Munisípiu Covalima no Parte kompetente sira hodi ajuda fó apoiu seguransa durante prezu sira iha Aeroportu Suai. (*)